Accessibility links

шимбә, 3 декабрь 2016, Казан вакыты 14:51

Radik Xäbirov üz awıruında üze ğayıpleme?


Armiädän ülem xälendä qaytqan Radik Xäbirovnıñ eşen tikşerü däwam itä. Bu könnärdä Xäbirov xezmät itkän Totsk garnizonında Tatarstannıñ cämäğät pulata äğzaları bulıp qayttı. Xärbi bülekkä säfär keçe serjant Radik Xäbirov eşendä nindi üzgäreşlär kiterde?

Totsk garnizonında cämäğät pulata äğzälärı xärbilär häm şul isäptä Radik belän bergä xezmät itkän soldatlar belän dä aralaşqannar. Döres, Totsk xärbi bülegendä Radik bik az bulğan, ul anda nibarı dürt kön xezmät itep ölgergän. Şuña kürä dä soldatlar anı bik xäterlämi. Ä xärbi bülektäge tärtip turında cämäğät pulata äğzäse Rişat Xäyretdinov bolay dip söyläde:

Bez Radik xezmät itkän kazarmada häm şulay uq başqalarında da buldıq. Äytergä kiräk, alar bezdä yaxşı tä'sir qaldırdı. Barlıq bülmälärne dä yörep çıqtıq, aşxanä, klub, meditsina bülege - alarnıñ barısında da normal' xärbi tärtip.

Rişat Xäyretdinov äytüençä, soldatlar Radik turında ul bik az aralaşuçan, üz eçenä biklängän yeget dip söylilär. Radik Xäbirovnıñ ruxi sälämätlegendä isä bernindi şik yuq, di Rişat Xäyretdinov. Armiägä ul saw-sälämät bulıp kitkän. Ämma armiä saflarında xezmät itü öçen keşegä fizik yaqtan ğına tügel, ä ruxi dä bik köçle bulırğa kiräk di ul. Rişat Xäyretdinov däwam itä:

Radikka qarata bälki naçar mönäsäbät bulğandır, ä bälki anıñ üz-üzen totışı da bik normal' bulmağandır - min bolarnıñ bersen dä inqar itmim. Mondıy ğädäti tormışta keşe üzen ber törle kürsätergä, ä armiä şikelle ğädättän tış şartlarda - başqaça. Soldatlar tormışı ul bik üzençälekle moxit. Aña künegä belergä kiräk. Yegetlär nigezdä bu moxitkä öyränä, tik qayberäwlär genä künegä almıy. Alarğa bu oçraqta yärdäm kiräk. Xärbi bülektäge tabip Radikka yärdäm itärgä tırışqan. Ämma Xäbirov tabipqa xärbi bülektä xezmät itmäyäçägen häm aña yärdäm itü faydasız dip äytep kilgän.

Şulay da niqädär awır bulsa da, ätise belän üskän Radiknıñ mondıy qurqınıç adımnarğa baruı, xätta üz-üzenä qul salırğa tırışuı añlaşılmıy. Bügen yeget ülem xälendä yata. Xärbi bülektäge tärtipkä kilgändä, soldatlarnı imgätü oçraqları yışayıp kitü armiäneñ abruyın kütärmi. Şuña kürä dä törle qunaqlar kilgänçe xärbi büleklärneñ tärtiben yaxşırtıp kürsätü bälki maxsus ta eşlängän ğämäl.

Al'bina Zäynulla

XS
SM
MD
LG