Accessibility links

шимбә, 10 декабрь 2016, Казан вакыты 02:26

Libandağı Tınıçlıq Köçlärendä möselman illäreneñ öleşe nindi bulır?


Törkiä parlamentı sişämbe könne Libandağı BMO tınıçlıq köçlären nığıtu öçen törek xärbilären cibärü mäsäläsen tawışqa quya. Berläşkän Millätlär Oyışması Libandağı xalıqara köçlärneñ yartısın möselman illärennän kilgän xärbilär täşkil itär dip ömetlänä. Ämma älegä bu köçlärneñ küpçelegen Yewropa illäre cibärergä oxşıy. Küpçelek möselman illäre anda qatnaşırğa bik aşıqmıy.

Elegräk Törkiä tışqı eşlär ministrı Abdulla Göl Törkiä Libanğa üz xärbilären cibärgän oçraqta da alarnıñ sanı ber meñnän artmıyaçaq dip beldergän ide. Premyer ministr Räcäp Tayyip Erdogan häm başqa yuğarı räsmilär Törkiä töbäktä iminlek saqlawğa üz öleşen kertergä tieş dip ğäskär cibärüne yaqlap çıqtı. Ankara İzrail belän dä Liban belän dä dustanä mönäsäbättä tora.

Ämma parlamenttağı oppozitsiä häm xakimiättäge partiäseneñ qayber äğzaları Törkiä tınıçlıq saqlawçıları anda qurqınıç astında bulaçaq dip Libanğa ğäskär cibärügä qarşı çıqtı.

Moñarçı Libandağı BMO tınışlıq köçlären köçäytügä üzlärennän öleş kertergä berniçä genä möselman ile rizalıq belderde.

Şularnıñ berse Qatar. Bu turıda düşämbe könne BMO general sekretare Kofi Annan belän urtaq matbuğat oçraşuına Qatar tışqı eşlär ministrı Şäix Xämät ät-Tani belderde.

"Qatar xökümäte Libanğa 200-300-läp xärbi cibärergä qarar itte. Bez dönyağa anda azsanlı ğına bulsa da ğäräp köçläre dä buluın belderergä telibez" dide Ät-Tani.

Älegä Qatar Liban tınıçlıq köçlärenä quşılğan berdänber ğäräp ile. Başqa ğäräp illäre Libanğa ğäskär cibärü BMO aradaşlığında tözelgän kileşü nigezendä İzrail belän xezmättäşlek bularaq qabul itelergä mömkin dip anda üz köçlären cibärüdän tıyılıp qalır kebek.

Dönyanıñ iñ zur möselman ile bulğan İndoneziä uzğan atnada Libanğa ber meñ xärbi cibärergä cıyınuın belderde. Libanğa üz tınıçlıq köçlären Azärbäycan da cibärergä cıyına. Ämma başta bu qarar parlamentta raslanırğa tieş.

Tağın ber möselman ile Malayziä şulay uq ber meñ xärbien täqdim itte. Banğladış ta Libanda tınıçlıq saqlawğa quşılırğa teli.

Älegä Liban tınıçlıq köçläreneñ töp öleşen Yewropa illäre xärbiläre täşkil itär dip kötelä. İñ zur ğäskär İtaliädän kiläçäk. Ul 3000 xärbien birä. Häm alar inde atna axırında Libanğa kilä başladı. Fransiä 2 meñ, İspaniä ber meñnän artıq xärbi cibärä. Moña Polşa belän Belgiä dä quşıla.

Avgust ayında Libandağı Xizbulla belän İzrail arasında ireşelgän atışlarnı tuqtatu kileşüe nigezendä Libannıñ könyağındağı xalıqara tınıçlıq saqlaw köçläre sanı 15 meñgä citkerelergä tieş.

Naif Aqmal, Praga.
XS
SM
MD
LG