Accessibility links

якшәмбе, 4 декабрь 2016, Казан вакыты 23:25

“Tatnet yoldızları” bäygesenä säxifälär qabul itü tämamlandı


“Tatnet yoldızları” bäygesenä bıyıl 178 säxifä qabul itelgän. Bu uzğan yıl belän çağıştırğanda şaqtıy küp. Oyıştıru komitetınıñ äğzası Aynur Sibgatullin belderüençä, ayıruça soñğı könnärdä üz säxifälären täqdim itüçelär şaqtıy artqan. Şul säbäple bäygene tağın ike köngä ozınaytqannar.

Ämma ni qızğanıç, täqdim itelgän saylarnı qarağaç isä bäygeneñ oyıştıru komitetı tatar telendä bulğan “Tuğan tel” häm “Matbuğat” digän büleklärne berläşterergä bulğan. Monı Aynur Sibgatullin aptırağanlıqtan yasalğan adım dip atadı. Çönki älege nominasiälärgä täqdim itelgän säxifälär bik az bulğan. Ayıruça tatar telendäge säxifälärne Tatar däwlät gumanitar-pedagogiqa universitetında eşläwçe avtomatlaştırılğan idärä sistemaları bülege citäkçese Rail Ğatawllin täqdim itkän. “Azatlıq” radiosına Rail Ğataullin

Min Tatarstannıñ Mäğärif häm fän ministrlığı saytın, “İnformatika-tatarça”, 5нче tatar gimnaziäse säxifälären täqdim ittem.

Rail Ğataullin bäygegä kübräk mäğärif häm fän ölkäsenä qarağan säxifälärne täqdim itep kilä. Bilgele bulğança, rus telendä 8, tatar telendä 4 nominasiä bilgelängän ide. Tatar telendä isä inde atap uzılğan “Matbuğat” häm “Tuğan tel” säxifälärennän başqa Tatar dönyası belän Mäğärif häm fän digän nominasiälär bar ide.

Bäygegä täqdim itelgän säxifälär şaqtıy çuar. Alar arasında zapas çast'lär täqdim itüçe, torbalar citeşterüçe, ğomumän satu-alu oyışmaları belän bäyle säxifälär şaqtıy. Monnan tış sport, törle saytlar yasawçı säxifälär täqdim itelgän.

Ämma Tatarstannan çittä yäşäwçe millättäşlärebezneñ dä säxifäläre şaqtıy kürenä. Alarnıñ küpçelege rus telendä bulsa da, tatar dönyası belän bäyle. Mäsälän, Mäskäw tatar yäşläre säxifäse, Peterburg Sabantuyı, Orenburg tatarları, Tübän Novgorodtağı Safacay awılı, Sankt-Peterburgnıñ “Tatarstan” tatar cämğiäte säxifäläre küzgä taşlana. Şulay uq Başqortstanda tatar telendä çığuçı “Qızıl Tañ” häm “Ömet” gäcitläre säxifäläre dä birelgän. Qırım tatarları belän bäyle bulğan berniçä säxifä bar.

Tatar mädäniäte häm sänğäte belän bäyle säxifälär isä ayıruça küp. Kompozitor Sara Sadıyqova, Almaniädä yäşüçe bayançı Aydar Ğäynullin, cırçı İdeliä, İttifaq törkeme häm başqalar. Monnan tış Tatarstan rayonnarı häm awılları da üz säxifälären täqdim itkän. Arça, Baltaç, Mendeleewski rayonnarı häm başqalar.

Aynur Sibgatullin belderüençä, ciñüçelär isemlege oktäber başında bilgele bulaçaq.

Landış Xarrasova

XS
SM
MD
LG