Accessibility links

дүшәмбе, 5 декабрь 2016, Казан вакыты 11:37

“Söläyman” mäçete işetmäwçelärne islam nigezlärenä öyrätä


İslam dinenä öyränü ğadi keşelär öçen dä ğayät awır. Ä qul xäräkätläre, ım-işarä belän dinne üzläşterü - ikelätä qatlawlı eş. Ämma “Söläyman” mäçete bu izge häm cawaplı eşkä üze alınğan. Mäçetneñ imam-xatıybı İldar xäzrät Bayyazitov äytüençä, mondıy däreslär buldıru niäte monnan inde 3 yıl elek tuğan. Mäçetkä yörüçelär arasında tumıştan işetmäwçe, ämma islam nigezlären öyränergä teläwçelär dä bar. Alar mäçetkä üzläre bu soraw belän möräcäğät itälär. Älegä isä mäçettä uqırğa teläwçelärne terkäw bara. Biregä keçe yäştägelär dä, olılar da yöri ala. Bügenge köngä barlığı 16 ğariza birelgän.

Mömkinlekläre çiklängän keşelärgä islamnı öyrätergä mäçetneñ uqıtu bülege citäkçese Mälikä Gıyl'metdinova alınğan. Monıñ öçen ul maxsus qul xäräkätläre häm işarälär belän söyläşü däreslären öyrängän. Qazannıñ 6 nçı nomerlı internat balaları Mälikä xanım yärdäme belän bu däreslärne üzläşterä ikän inde.

Bilgele, uqıtu öçen däresleklär, törle uqu äsbapları da kiräk. Ämma İldar xäzrät äytüençä, näq menä işetmäwçelär öçen tözelgän islam nigezläre kitapları tabu bik awır. Alar bötenläy yuq däräcäsendä.

Şuşı eşne başlağan waqıtta bez arxivlardan ezli başladıq, törle şähärlärgä, töbäklärgä möräcäğät ittek, İnternettan üzem qarap utırdım – bernindi dä mäğlümat yuq ide. Kitaplar, däresleklär häm başqa şundıy uqıtu äsbapları – bernärsä dä tapmadıq bez. Şuña kürä Mälikä xanım üze, ul 15 yıl buyı uqıtuçı bulıp eşläde, islam nigezläre digän uqıtu äsbapları çığarırğa uylıy häm şul kitaplar belän üze uqıtırğa niätli.

“Söläyman” şikelle mäçetlär Rusiädä bütän yuq. Ämma ul Törkiädä bar. Näq şundıy uq isemle mäçet. “Söläyman” mäçete xezmätkärläre işetmäwçe Tatarstan keşeläre öçen kitaplar sorap, Törkiägä möräcäğät itep qarağannar. Ämma älegä qädär bernindi dä yärdäm kilmi. Şuña kürä mondıy kitaplarnı üzläre çığarırğa uylıy mäçet xezmätkärläre.

Şunnan berär mäğlümat bulmas mikän dip, töreklärgä dä möräcäğät ittek, läkin älegä qädär bu kitaplar yuq. Şuña kürä üzebez çığarırğa uylıybız, alar äzer inde. Alar 3 kitap – balalar öçen, olılar öçen, başlanğıç xärefläre, başqa törle islam nigezläre, äxlaq däresläre kergän kitaplar. Häm tösle, räsemnär dä kergän däftärlär çığarırğa uylıybız.

Kitap çığaru, bilgele, östämä çığımnar da taläp itä. Häm ul çığımnarnı mäçet kenä kütärä almıy. Alar deputatlarğa, iğänäçelärgä yärdäm sorap möräcäğät itep qarağannar. Ämma İldar xäzrät süzlärenä qarağanda, älegä qädär ber qaydan da yärdäm kilgäne yuq. “Bälki onıtqannardır”, di xäzrät. Tik qayçan islärenä töşer ikän? Din öyränergä teläwçe ğäriplärgä küpme kötärgä?

Güzäl Zıyätdinova

XS
SM
MD
LG