Accessibility links

сишәмбе, 6 декабрь 2016, Казан вакыты 04:01

Swerdlaw ölkäse başqort milli üzäge 5 yıllığın bäyräm itte


Yekaterinburg şähärendä urnaşqan Tınıçlıq häm Duslıq yortında Swerdlovski ölkä başqort milli üzäge tözelügä biş yıl tuluğa bağışlanğan bäyräm kiçäse bulıp uzdı. Bu çaranı tağın da zur tantanağa äwereldergän tağın ber waqiğa buldı, şunda uq başqort milli üzäge vitse-prezidentı, kürenekle yazuçı, publitsist Ameliä Täqiulla qızı Aliewa üzeneñ 75 yıllıq yübileyen bilgeläp ütte.

Ameliä xanımnıñ küptän tügel “XX ğasır balaları” dip atalğan ike tomlıq zur kitabı basılıp çıqqan ide. Kitap danlı tarixqa iä bulğan XX ğasırda Uralda yäşägän törle ataqlı şäxeslärneñ yazmışın yaqtırtıp, uquçılar arasında kiñ yañğıraş taptı. Ameliä xanımnıñ ätise Täqiulla Xannan ulı Aliev suğışqa qädärle yıllarda bik zur belemle injener-energetik bulğan. Yekaterinburg şähärendä iñ berençe trolleybuslar anıñ tırışlığı belän yöri başlağan. Yübiley kiçäsen açıp cibärgändä, Tınıçlıq häm Duclıq yortınıñ direktorı Tahir äfände Soltanov bu turıda da iskärtep ütte häm bu könnärdä şähär xakimiätendä Täqiulla Aliev uramı buldıru häm trolleybus tuqtalışlarınıñ bersen şul uq isem belän ataw turında eş alıp barıluın äytte.

Kiçägä Ameliä Täqiulla qızınıñ balaçaq häm yäşlek dusları, xezmättäşläre, qälämdäşläre, başqort milli üzäge aqtiwistları häm başqa kiñ cämägätçelek cıyılğan ide. Cıyıluçılar arasında kürenekle kompozitor Yevgeniy Rodığıyn, Tatarstannıñ Uraldağı daimi wäkile urınbasarı Xäydär Ğilfänov, ataqlı ğälimnär, kürenekle jurnalistlar häm başqa icat keşeläre küp buldı. Biredä törle qotlawlar, rus, tatar häm başqort tellärendä törle cırlar yañğıradı.

Kiçädä çığış yasawçılarnıñ qayberläre bilgeläp ütkänçä, başqort milli üzäge tözelep eşli başlawğa biş yıl tulu waqıyğasın häm başqort qızınıñ ğömer bäyrämen bilgeläp ütärgä dip, biregä ruslar, tatarlar, başqortlar, yähüdlär cıyılğan, häm alarnıñ härberse biredä üzen irken, räxät xis itä. Duslıq, tuğanlıq, yaqınlıq xisläre ğomumän Uralda yäşäwçelärneñ xolqına señgän. Qotoçqıç şartlawlar, hälaqätlär, terrorlar zamanında bu xislärne saqlap qalu bik möhim digän fikerlär dä yañğıradı.

Kiçäneñ xucası, başqort milli üzäge citäkçese Fähimä Yosıpowa Swerdlovski ölkäsendä yäşäwçe başqort xalqınıñ 2007nçe yılda Başqortstannıñ Rossiägä irekle räweştä quşıluına 450 yıl tuluın bäyräm itügä äzerlek qısalarında bik zur eşlär başqaruı turında söyläde. Yäşlärne, balalarnı ictimağıy eşlärgä tartu, başqort klassı açu östendä eşläw belän berrättän, bügenge köndä başqort milli üzäge qarşında eşläp kilgän teatr tügäräge bu datağa bağışlap yaña spektäkl äzerli.

Fähimä xanım fikerençä, Başqortstannıñ Rossiägä quşıluı babalar tarafınnan bik ziräk adım bulğan. “Bu däwer eçendä başqort xalqı yuğalmağan, kiresençä, üzen yaña p'yedestalğa kütärgän, üzebezneñ prezidentıbız bar, suwerenlığıbız bar, bez Başqortstan belän ğorurlanabız, - di ul, - Bez monda, Ural cirendä tatarlar belän ber xalıq kebek dus yäşibez, Tatarstan belän Başqortstannıñ da, ike tuğandaş respublik bularaq, duslığı nığısın digän teläktä qalabız”. Bäyräm kiçäse milli rizıqlar belän sığılıp torğan tügäräk çäy östäle yanında tämamlandı.

Fäwiä Safiullina, Yekaterinburg

XS
SM
MD
LG