Accessibility links

җомга, 9 декабрь 2016, Казан вакыты 07:05

Samar “Yaqtılıq” mäktäbendä balalar sanı arttı


Millionlı xalqı bulğan Samar şähärendä öç yözgä yaqın mäktäp, million xalıqnıñ ille meñ tiräse – tatarlar. Menä şul tatarlar älegä tatar balalarınnan ğına tuplanğan mäktäp tota alalar. Bıyılğı uqu yılın “Yaqtılıq” üzeneñ ör- yaña yanqorma binası belän açıp cibärer dip ömetlängän ide. Süze genä yanqorma bit. Yanqorma öç qatlı häm iske binadan öç märtäbä zurraq. Şulay da ber- ike ay eçendä yanqormanıñ berençe qatı safqa basarğa tieş ikän.

Uquçılar, uqıtuçılar, ata- analar aldında mäktäp direktorı Xaridä xanım Daşkina mondıy sannar kiterde.

“Yaqtılıq” üzeneñ 10- nçı uqu yılın başlap cibärä. Ägärdä 10 yıl elek sentäber lineykasında 187 bala basıp torsa, bıyıl mäktäptä 255 bala uqıyaçaq, tağın 68 tatar balası “Yaqtılıq”nı östen kürgän. Bıltırğı belän çağıştırğanda balalar sanı qırıqqa artqan. Bıyıl berençe sıynıfqa 33 narasıy kilgän, mäktäp binası tözep betergänçä, berençe häm ikençe sıynıf uquçıları berençe çirekne “Altın balıq” şifaxanäsendä yäşäp belem dä alaçaqlar, sälämätleklären dä nığıtaçaqlar.

Uzğan uqu yılında urta mäktäpne tämamlawçılarnıñ 93 %-ı universitetlarğa, institutlarğa kergännär, qalğannarı - texnikumnarğa. Ä Röstäm Waxitov mäktäpne medal'gä tämamlağan häm Samarnıñ ayerokosmik universitetına uqırğa kergän.

Şunısı da quanıçlı, 9-nçı, 10-nçı, 11- nçe sıynıftağılar cäyge kanikul könnärendä mäktäp tözeleşendä dä eşlägännär. Här sıynıf bülmäsen maturaytu yözennän ata- analar üz kesälärennän matdi yärdäm kürsätkännär.

Möğallimälär tağın da yäşärgän, bersennän- berse yäş çibär tatar xatınnarı uqıtırğa kilgännär. Ä menä rus telennän belemne İrina xanım Şapiro, ingliz telennän Ol'ğa Kosmaçeva biräçäklär. Mäktäp kollektivındağı ike rus xatını inde süzleklär alıp tatar telen öyränä başlağannar.

“Yaqtılıq”ta moña qädär ike genä ir- at uqıtuçı bulsa, bıyıl öçençe ir – Rinat İbätov kilgän. İkençe sıynıfqa 18 balağa 6 uquçı östälgän, öçençedä 23 uquçığa 4 östälgän.

Här klassqa çit mäktäplärdän tatar balaları kilgän, iñ küp uquçılı klass – ul sigezençe, monda 28 bala uqıyaçaq.

Ğomumän tatar balalarınnan ğına tuplanğan “Yaqtılıq” yıldan- yıl üseş yağında, çönki monda iñ yaxşı tärtip urnaştırılğan.

Cäyge könnärendä “Yaqtılıq”ta uquçılar Tatarstanda “Sälät”tä yal itkännär, Samar ölkäsendäge Mäçäläy awılında etnografik ekspeditsiädä bulğannar. Rus şaşqaları buyınça Bötenrossiä yarışlarında matur urınnar alğannar.

“Yaqtılıq”ta ingliz telen Britanya metodikası buyınça uqıtalar.

Berençe sıynıftağı 33 balağa häm alarnıñ uqıtuçılarına, tärbiäçelärenä Samar şähär milli- mädäni möxtäriäte räise Cämil Wäliullin hämmäsenä zur- zur tartma känfitlär büläk itte.

217 baladan başlanğan “Yaqtılıq” bügen 255 uquçını üzenä cıydı, plannarı zurdan - 2007 yılğı sentäbergä “Yaqtılıq” balalar sanın 400-gä citkezü belän yanıp yäşi.

“Tuğan tel” isemle Samara ölkä tatar cämğiäte direktorı ata- analarğa, uquçılarğa möräcäğät itep ber täqdim kertte. Uqu yılı däwerendä här bala tağın berär tanışın ğına alıp kilsä dä, “Yaqtılıq”ta 500 bala bulaçaq.

Samil Bahautdin, Samar

XS
SM
MD
LG