Accessibility links

шимбә, 10 декабрь 2016, Казан вакыты 23:44

Şäymiev räsmi säfär belän Perm'dä buldı


Perm'dä M.Şäymiev ike cıyılışta qatnaştı. Anıñ berse, Rusiä prokurorı Yuri Çayqa räislegendä uzğan tarmakara kiñäşmäse. Älege kiñäşmädä İdel buyı federal' okrugında cinayätçelek häm rişwätçelekkä qarşı köräşne köçäytü, xoquq bozularnı kisätü häm xoquq tärtiben nığıtu mäs’äläläre xaqında fiker alıştılar. Çarada Rusiäneñ eçke eşlär ministrı Räşit Nurgaliev, Rusiä prezidentınıñ İdel buyı federal' okrugındağı wäkile Aleksandr Konovalov, okrug töbäkläre citäkçeläre qatnaştı.

Perm'dä Tatarstan prezidentı qatnaşqan tağın ber räsmi çara - İdel buyı federal' okrugnıñ töbäk citäkçeläre oçraşuı. Älege oçraşuda su häm urman xucalıqları belän idärä itü strukturaların kamil'läşterü, bu ölkädä wäkälätlärne töbäklärgä tapşıru mäs’äläläre xaqında da fiker alışqannar. Utırışta Rusiäneñ tabiği resurslar ministrı urınbasarı Anatoliy Temkin, federal' su resursları agentlığı citäkçese Röstäm Xämitov, Federal' urman xucalığı agentlığı citäkçese Waleri Roşçupkin, İdel buyı federal' okrug töbäkläreneñ citäkçeläre qatnaşqan. Tatarstan citäkçelege isä alda telgä alınğan wäkälätlärne töbäklärgä qaytaru kiräklege xaqında inde berniçä qat söyläp kilde. M.Şäymiev belderüençä, su häm urman xucalıqları belän idärä itü wäkäläten töbäklärgä tapşıru mexanizmı eşkärteläçäk häm Perm'dä uzğan utırışnıñ berketmä qararları Rusiä Xökümätenä cibärelgän.

İdel buyı federal' okrugnıñ töbäk citäkçelege oçraşuların bik faydalı dip sanıy Tatarstan prezidentı. Anıñ äytüençä, soñğı un yıl eçendä Rusiä Federatsiäse Xökümäteneñ gubernatorlar häm respublika citäkçeläre belän cıyılıp, nindi dä bulsa konkret mäs'älälär turında fiker alışqanı bulmadı. Töbäk başlıqlarınıñ könüzäk problemalar xaqında fiker alışıp, üz täqdimnären kertä torğan berdänber däwlät oyışması ul - Rusiä prezidentı qarşındağı Däwlät Şurası, dip bilgeläp uzdı M.Şäymiev jurnalistlar belän bulğan äñgämäsendä.

İdel buyı federal' okrugında Rusiä prezidentınıñ tulı wäkälätle wäkile qarşındağı Şuranıñ kiläse utırışı şuşı yılnıñ dekaber ayında Başqortstanda uzaçaq. Älege utırışta aviatsiä sänäğäten üsterü turındağı notıq belän Tatarstan prezidentı da çığış yasar dip kötelä. Monnan tış, Ufada uzaçaq bu utırışta töbäk başlıqları İdel buyı federal' okrugında ilküläm proyektlarnı häm yäşlär säyäsäten tormışqa aşıru mäs’äläläre xaqında da fiker alışaçaq.

Al'bina Zäynulla

XS
SM
MD
LG