Accessibility links

дүшәмбе, 5 декабрь 2016, Казан вакыты 23:53

Törkiä wäkillegeneñ säfäre däwam itä


Comğa könne Törkiä wäkillegeneñ Başqortstanğa eş säfäre däwam itte. Xäbär itüebezçä, Törkiä däwlät ministrı Körşäd Tüzmän citäkçelegendäge zur ğına wäkillek Ufağa atnaqiç könne kilgän ide. Wäkillek eçendä räsmi dairälär dä, eşquarlar da bar. Başqortstanğa şulay uq Törkiäneñ Rusiädäge tulı xoquqlı häm ğädättän tış ilçese Qortılış Taşkent ta kilde.

Comğa könne qunaqlar Törkiä tözüçeläre tarafınnan Ufanıñ Şaqşa bistäsendä tözelep betkän Şeşälär citeşterü şirkäten açu tantanalarında qatnaştı. Biregä Başqortstannıñ barlıq yuğarı citäkçeläre dä kilgän ide.

Annan soñ Törkiä wäkillären Başqortstan Prezidentı Mortaza Räximov ayırım da qabul itte häm üzara xezmättäşlekne arttıru xaqında söyläşülär alıp bardı. Anıñ süzlärençä, äle Törkiä belän Başqortstan arasındağı üzara alış-bireş ike respubliknıñ zur mömkinleklärenä täñgäl kilmi, üzara säwdäne berniçä tapqırğa arttıru öçen barlıq şartlar da bar, dide ul.

Törkiä däwlät ministrı Körşäd Tüzmän üz çığışında soñğı berniçä yılda Törkiä belän Başqortstan arasında faydalı xezmättäşlekneñ totrıqlı üsä baruı xaqında äytte:

"Başqortstan belän Törkiä arasında xezmättäşlek arta. Äle menä şeşälär citeşterü şirkäten açu da zur adım. Kiläçäktä, älbättä inde, üzara bäyläneşlärne tağın da arttıraçaqbız."

Törkiä däwlät ministrı Körşäd Tüzmän süzlärençä, Törkiä belän Başqorstan arasında üzara xezmättäşlek tege yäki bu tawarlar belän säwdä iteşü häm tözeleş ölkälärendä genä tügel, ä neft häm neft ximiäse tarmağında da alıp barıla ala. Xäzer bu turıda da aldan qayber kileşülär bar inde.

Törkiä wäkillegeneñ Başqortstanğa eş säfäre däwam itä. Qunaqlar Ufadağı qayber şirkätlärdä häm oyışmalarda bulaçaq, törek eşçeläre belän oçraşaçaq.

XS
SM
MD
LG