Başqortstanda soñğı yıllarda törle yaña ğäzetälar häm jurnallar sanı bermä-ber arttı. Alar arasında respublik xaqimiätlärenä buysınğannarı da, şäxsi qullardağı basmalar da bar. Mäğlümat çaraları artsa da, küp kenä säyäsät belgeçläre häm bäysez küzätüçelär fikerençä, Başqortstan Rusiä töbäkläre arasında süz irege iñ qısılğan töbäklärneñ berse. Üze dä elekke jurnalist, ä xäzerge köndä Başqortstan Däwlät Cıyılışı-Qorıltay deputatı bulğan Edward Murzin süzlärençä, matbuğat irege mäsäläsendä Başqortstan respublikı bügenge köndä elekke kommunistlar zamanındağıdan da artqaraq alıp taşlanğan töbäk. “Respublikta Wiktor Şmaqov citäklägän “Prowinsiälnıyı westi” häm Başqortstan Tatar milli-mädäni moxtariäte çığaruçı “Xalıq ixtıyarı” kebek ike bäysez gäzittän başqa oppozitsiädäge ber genä basma da yuq, alarnı da gel genä ezärlekläp häm mäxkämägä tartıp toralar, - di Murzin äfände. – Ä inde räsmi mäğlümat çaraları respublik xaqimiätlärenä mädxiä cırlawdan buşamıy”.
Xökümät aqçasına çığuçı “Başqortstan qızı” jurnalı baş möxärrire Yomabıykä İlyäsowa süzlärençä, xalıq aqçasına çıqqan räsmi basmalar, tabiği inde xalıq mänfägätlärenä xezmät itärgä tieş:
"Xalıq aqçasına çıqqaç bez inde xalıq mänfägätlären yaqlarğa tieşbez. Üz eşebezne cirenä citkerep başqarırğa, xalıqnıñ yaqlawçısı bulırğa tieşbez."
Başqortstandağı ike börtek bäysez gäzitneñ berse – “Prowinsiälnıyı westi” basması. Biredä räsmi xaqimiätlärgä qarşı çaqırular basılğan dip, anıñ möxärrire Wiktor Şmaqov qulğa da alınğan ide. Anı irekkä çığardılar, ämma äle anıñ östennän mäxkämä eşe yabılmağan. Bügenge köndä üzenä qarata cinayät eşe qäğäzlären öyränä ul. Şul uq waqıtta Wiktor Şmaqov Başqortstanda xör ruxlı jurnalistlarnı yaqlaw häm alarğa yärdäm itü fondın tözü xästärleklären başladı. “Ämma bu eş äle bik aqrın bara, - di Şmaqov äfände. – Älege dä bayağı qurqu xise çabudan totadır inde”.
Şmaqov – "Min şuşı fondnı tözergä dip küp keşelärgä möräcägät itäm. Ämma äle alarnıñ barısı da moña rizalıq birep betä almıy. Qurqalardır da inde. Çönki Başqortstan jurnalistları arasında ğına tügel, ä böten Rusiädä süz irege nıq qısıldı xäzer. "
Ufadağı “Prowinsiälnıyı westi” bäysez gäzite möxärrire Wiktor Şmaqov älege köndä mäxkämä yulın taptarğa mäcbür buluın äytä. Üz gäzitendä respublik xaqimiätlären köç qullanu yulı belän alıp taşlarğa çaqırğan mäqälälär bastırğan öçen digän añlatma belän mäxkämägä tartıluın säyäsi ezärlekläw dip isäpli ul. “Jurnalistlarnıñ xalıqara teläktäşlek könen bilgelägän bügenge köndä dä min respublik proquraturasına barıp, üzemä qarata cıyılğan ğäipläwlär doqumentları belän tanışıp utırdım”, - di Şmaqov äfände.
Şmaqov – "Min äle proquraturada doqumentlar belän tanışam. Cinayät qodeksınıñ ike maddäse buyınça mäxkämägä tapşırğannar ide minem eşne. Menä adwoqatlar belän barlıq qäğäzlärne öyränäbez."
