Accessibility links

җомга, 9 декабрь 2016, Казан вакыты 04:57

Qabulda Äxmäd Şah Masudnı iskä aldılar


Äxmäd Şah Masud üz çorında sovetlarğa qarşı, soñınnan Äfğanstannıñ xökümät köçläre häm Taliban xäräkätenä qarşı suğışqan xärbi citäkçe.

"Panjşir arıslanı" quşamatın yörtkän Masud – här suğışta iñ uñışlı citäkçelärneñ berse ide. Qabul Taliban kontrolenä töşkänçe Masud Borhanetdin Rabbani xökümäteneñ saqlanu ministrı da bulıp aldı. Xakimiätkä taliplar kilgäç Masud üzeneñ Panjşir üzänenä kitep qaçtı. 2001nçe yılnıñ 9nçı sintäberendä Masud yanına jurnalist dip yaqınlaşqan intixarçı – bomba şartlatıp, äfğan xärbi citäkçese häläk buldı. Bügenge köndä äfğan xalqı Masudnı milli qaharman dip sanıy. Qabulda anı iskä alu cıyınında Äfğan prezidentı Hamid Qarzai, Masudnı – şäxit kitkän qaharman, dip atadı:

"Bügen äfğan şäxitlären iskä alu çarasında bez üzen il xaqına qorban itkän şäxitne räxmät süzläre belän iskä alabız. Ul keşeneñ iseme – Äxmäd Şah Masud, min anı yaqınnan belä idem."

Çarada şulay uq Masudnıñ ber tuğanı Ahmad Wäli Masud häm 90nçı yıllar urtasında Äfğanstannı citäklägän Borhanetdin Rabbani çığışları buldı.

Masudnıñ üleme – ul citäklägän Tönyaq Alyansnıñ üleme belän tiñ ide. Äfğanstannıñ 5-10%tın üz kontrolendä totqan Tönyaq Alyansnı ciñergä Talibanğa küp waqıt kiräk bulmas ide. Ämma Masud ülemenä 2 kön digändä dönyanı üzgärtkän – 11 sintäber terror ğämälläre buldı.

Taliban belän elemtädä torğan Osama bin Laden häm anıñ äl-Qaida oyışması tiz genä AQŞtağı höcümnärne oyıştıruçılar dip iğlan itelde häm – Äfğanstanda terrorğa qarşı suğış başlandı. Masud ülemenä 2 ay çaması waqıt uzğanda, Taliban Qabuldan häm Äfğanstannıñ zur öleşennän quıp çığarıldı häm Masud köçläre başqalağa kerep urnaştı. Äxmäd Şah Masudnıñ tuğan yağı "biş arıslan üzänendä" quyılğan häykäle yanına keşelär küp kilä.

Alsu Qormaş
XS
SM
MD
LG