Accessibility links

җомга, 9 декабрь 2016, Казан вакыты 06:51

İran turında söyläşü ike kön däwam itte


Yevropa Berlege İrannı uran bayıtu eşlären tuqtatıp BMO İminlek Şurası cäzasınnan qotılırğa çaqıra. Tähran uran bayıtuın tuqtatırğa cıyınmıy, barı tik bu eşçänlekneñ maqsatı – atom bombası yasaw tügel, dip belderä.

Şimbä, 9 sintäber bulğan söyläşülärne Solananıñ matbuğat wäkile Cristina Gallach – "uñay häm näticäle" dip bäyläde.

Oçraşu waqıtında Solana Ali Larijanidan İrannıñ 21 bitlek cawap xatına añlatmalar sorağan. Mäğlüm bulğança, Tähran, ägär dä atom eşçänlegen tuqtatsa, 6 il täqdimnärenä – cawap yazğan ide.

Larijaninıñ cawabı bezgä bilgesez, ämma anıñ süzlärenä qarağanda, söyläşü ömetle bulğan.

U arada İrannıñ üzennän işetelgän belderülär alay uq ömetle dip äytep bulmıy. Küptän tügel İran prezidentı Mäxmüd Äxmädinecad, uran bayıtu – İrannıñ xoquqı häm çittän bulğan basım astında anı tuqtatırğa cıyınmawın beldergän ide:

"İran xalqı ber qayçan da basımğa birelmiäçäk häm xoquqlarınıñ bozıluın qabul itmiäçäk, belep torsınnar."

AQŞ Berläşkän Millätlär Oyışmasın, İranğa kiçekmästän çikläwläre kertergä çaqıra. Uzğan atnada Berlinda Germaniä, Britaniä, Fransiä, Qıtay häm Rusiä diplomatları belän bulğan oçraşuda, Amerikan däwlät sekretare urınbasarı Nicholas Burns bu xaqta tağın ber tapqır qabatladı.

"İranlılar uran bayıtu programmaların tuqtataçaqları turında äytmäde, dimäk bezgä – äytkänne eşlämi başqa çara yuq dimäk BMO İminlek Şurasın İranğa qarşı çikläwlär kertergä çaqırabız."

Ämma Rusiä häm Qıtay açıq itep, İranğa qarşı çaralar kürüne yaqlamawların belderde.

Waşington häm Yevropa Berlege illäre, İrannıñ – atom eşçänlege elektr energiäse öçen kiräk digän añlatmasına ışanmıy. Ämma dönyada 4nçe iñ zur neft däwläte bulğan İrannı iqtisadi izolyasiädä qaldıru da – dönya iqtisadına faydağa bulmayaçaq, şuña kürä Yevropa Berlege – İran belän kileşügä ireşüne östen kürä.

Alsu Qormaş
XS
SM
MD
LG