Accessibility links

якшәмбе, 11 декабрь 2016, Казан вакыты 01:32

9/11 turında ike film dönya kürde


Amerikanıñ kino sänğate Hollywood, 11 sintäber terror ğämällärenä üzençä cawap birde. Bıyıl faciğale xällärne çağıldırğan ike film dönya kürde. Bu tör filmarnıñ xalıqqa kürsätelüe – terror ğämällärennän soñ bulğan tetränü xiseneñ küpmeder däräcädä sürelüen añlata.

Baştan uq, New Yorktağı Dönya Säwdä Üzägenä ber ber artlı kilep bärelgän oçqıçlarnı turı efirda qarap torğan dönya cämäğätçelegeneñ – monıñ çınbarlıq buluına ışanası kilmäde. Çınnan da ul tasma – Hollywoodnıñ çirattağı filmı reklaması kebek kürende. Soñınnan amerikan filmı şirkäte, häläkät turında iskä töşermäs öçen üz äsärlärendä bulğan İgezäk Manaralar küreneşen üz filmarınnan töşerep qaldırdı. Bu küreneşlär, xäterläsägez – "Keşe-ürmäküç" häm "Qara kiemdäge keşelär" filmınıñ ikençe öleşendä bar ide.

Bügen wazğiät üzgärä. Hollywood 11nçe sintäber turında 2 film çığardı. Berse – Pensilvaniädä töşkän oçqıçta bulğan yulçılarnıñ terrorçılarğa qarşı toruları xaqında, anıñ iseme – "United 93 – 93nçe reys", yağni şul oçışnıñ iseme. Film citäkçese – Paul Greengrass. İkençese isä – çınbarlıqta bulğan xäl – şartlawdan soñ binada cimereklär astında qalğan ike polisiä xezmätkäre turında, anıñ iseme "Dönya Säwdä Üzäge – İgezäk Manaralar", anda töp rolne tanılğan akter Nicholas Cage uynıy, direktorı Oliver Stone. Britaniädä çığuçı kino sänğäte turındağı jurnal wäkile, täñqitçe Ali Cağfar, ike filmnıñ da mäğnäse bar, dip belderde:

"Minemçä, oçqıç turındağı film – kino sänğäte küzlegennän qarağanda uñışlıraq, ämma "Dönya Säwdä Üzäge – İgezäk Manaralar" digäne dä bik qızıq, aña qarata ber genä täñqit bula ala – filmda xislärgä birelü küpkä kitkän. Ämma üzebezne amerikannar urınına quysaq – ansı da añlaşıla."

Tağın ber kino-täñqitçe, şulay uq Britaniädä çığuçı Guardian basması xäbärçese Peter Bradshaw, Ali Cağfar belän riza tügel:

"Minem şäxsi fikerem – minemçä, "United 93" filmı – iskitkeç, yulçılarnıñ oçqıçta terrorçılarğa qarşı toruın, qotoçqıç şartlarnı häm alarnıñ xislären çağıldırğan film. Qızğanıçqa qarşı Oliver Stone filmı, uñışlı tügel. Quqrayğan stildä, xislär genä tulı film, axırda – 11nçe sintäberne Ğiraq belän bäyläw tırışlığı – berqatlılıqnı kürsätä."

Bu ike filmğa qarata Quşma Ştatlarda tamaşaçılar fikere dä ayırıldı. Küplär alarnı xuplap qarşı alsa, qalğannarı – äle bu tör sänğätkä irtä, dip belderde.

Tarixi waqiğälärne ekranğa çığaru bik awır eş – bigräk tä, waqiğälär äle küñellärdä saqlanğanda saq bulu zarur. Ämma belgeçlär fikerençä, bu tör filmnar çıqqan häm kürsätelgän ikän – dimäk xalıq alğa taba bara. Ber ni dä bulmağan kebek yäşämi, ä bulğanın qabul itep köndälek tormışın däwam itä.

"İgezäk Manaralar" filmı Rusiä ekrannarına 21 sintäber könne çığaçaq. "93nçe reys" dönyada april ayında uq kürsätelä başladı.

Alsu Qormaş
XS
SM
MD
LG