Accessibility links

якшәмбе, 11 декабрь 2016, Казан вакыты 03:18

Turında Qazan belän tanıştılar


Düşämbe kiçendä Röstäm Miñnexanov räsmi säfärgä kitte. Bu yulı – İtaliägä. İtäliäneñ Turin şähärendä ul Tatarstannı, döresräge Qazannı täqdim itäçäk. Tatarstan başqalası 2011 yılda uzaçaq cäyge universiadanı üzendä ütkärergä teläk belderde. Älege çaranı studentlarnıñ xalıqara sport berlege oyıştıra. Turinda şuşı könnärdä 2007 yılnıñ qışqı universiadasın täqdim itü uza. Şunda uq saylap alu komissiäse äğzäläre universiadanı oyıştırırğa teläwçe nämzätlär belän tanışa. Qazannan tış 2011 yılnı universiadanı üzlärendä ütkärergä Qıtay, Taywan, Pol’şa da teläk belderde. Respublika, Qazan xakimiäte wäkilläre şähär, respublika xaqında söyläde, videotasmalar aşa Tatarstan häm anıñ başqalası belän tanışırğa mömkinlek birde, bulaçaq universitet awılı belän tanıştırdı. Ä 12 sentäberdä isä Turinda Röstäm Miñnexanov häm Qazan başlığı İlsur Metşin studentlarnıñ xalıqara sprot berlege citäkçese belän oçraşıp söyläşäçäk.

Turindağı söyläşülär turında tulıraq mäğlümät alır öçen bez Tatarstan premyer-ministrınıñ tışqı säwdä elemtälär buyınça yärdämçese İskändär Möflihanovqa möräcäğät ittek. Telefon aşa Turinnan Azatlıq radiosı tıñlawçılarına ul menä närsälär söyläde.

Bu atnada bez Qazannı täqdim itäbez. Läkin älege täqdim itüneñ näticäläre äle 2007 yılnıñ ğinwarında ğına bilgele bulaçaq. Qazannıñ 2011 yılda cäyge universiadanı ütkärü şansları şaqtıy. Bez bik matur itep täqdim ittek Qazannı. Annarı bezne mondıy zur xalıqara däräcädäge çaralarnı ütkärü täcribäse dä yuq tügel

Sez Tatarstan premyer-ministrınıñ tışqı säwdä elemtälär buyınça yärdämçese İskändär Möflihanovnı işettegez. Ul Turinda uzğan söyläşülär turında söyläde. Alarnıñ niçek däwam itüe turında bez sezgä kiläse tapşırularıbızda da xäbär itep torırbız.

Äytergä kiräk, universiada dönyada bik däräcäle sport çarası. Anı olimpiya uyınnarınnan soñ ikençe urında tora, di oyıştıruçılar. Şuña da, älege çaranı Tatarstanda ütkärü bik abruylı häm däräcäle. Xäyer, xalıqara däräcädä meñyıllığın bilgeläp ütkän Qazan älege uyınnarnı da şaqtıy uñışlı ütkärä alaçaq, digän fikerdä toralar bu könnärdä Turinda Qazannı täqdim itüçelär.

Gölnaz İlgizär

XS
SM
MD
LG