Accessibility links

пәнҗешәмбе, 8 декабрь 2016, Казан вакыты 07:11

Yäşlär ayıqlıq bäyrämendä qatnaştı


Bu çaranıñ başqa bäyrämnärdän ayırması - ul xämersez ütte. Biregä kilgän yäşlär, yäşüsmerlär fäqät çäy eçtelär. Ayıqlıq bäyrämeneñ maqsatı da küpçelek yäşlärdä bulğan xämersez bäyräm - bäyräm tügel digän qaraşın üzgärtü. Çarağa kilgän yäşlärne alkogol' eçemleklärdän tügel, ä tormıştan, qızıqlı çaralardan, duslar belän aralaşudan täm tabıp, küñel açarğa öndädelär.

Ayıqlıq bäyräme Qazanda inde 12 tapqır uza. Anı oyıştıruçılar arasında narkotiklar äyläneşen tikşerüçe federal' xezmät İdäräseneñ Tatarstan bülekçäse, yäşlär eşläre, sport häm turizm ministrlığı, Qazan administratsiäse, narkologiä dispanserı bar.

Bıyılğı ayıqlıq bäyräme şähärneñ Boratınski muzey häm Lyadov baqçasında ütte. Östän yañğır yawıp torsa da, Lyadov baqçasına küp kenä yäşüsmerlär, balalar kilde. Alar öçen monda konsert programması, törle uyınnar, bäygelär, sport çaraları oyıştırıldı. Kilgän här keşegä baqçada buşlay çäy eçerdelär, bäygelärdä ciñüçelär tuñdırma belän sıylandı, atqa atlanıp yörede. Keçkenä balalar Boratınski muzeenda räsemnär yasadı. Alar araqı şeşälären, tämäkene qara belän, sport, duslar, söt räsemen qızıl tös belän töşerde. Çara xaqında bez yäşlärneñ üzlärennän soraştıq:

-Bik qızıqlı bu çara. Monda yäşlärne, balalarnı uyın aşa sälämät yäşäw räweşkä öyrätälär.

Älege çara Xalıqara ayıqlıq oyışmasınıñ Qazan bülekçäse yärdäme belän oyıştırıldı. Qazannıñ ayıqlıq cämğiäte 90 yıllardan birle eşli. Oyışma nigezdä olı keşelärdän torsa da, cämğiätneñ räise Vladimir Lovçev äytüençä, soñğı yıllarda biregä kübräk yäşlär kilä başladı. Qazan ayıqlıq cämğiäte profilaktik çaralar belän şöğellänä. Cämğıyät wäkilläre keşelärgä sälämät yäşäwneñ qimmäten añlatırğa tırışa, alar şulay uq tabiplarğa da yärdäm itä. Çit illärdä sälämät yäşäwneñ qimmäte bik yuğarı sanalsa, Rusiägä moña qädär äle yıraq. Ämma Vladimir Lovçev fikerençä, Rusiäneñ dä bu mäs'älädä yaxşı yaqqa üzgäreşläre yuq tügel:

Bu yunäleştä bezgä äle şaqtıy yul ütärgä kiräk, ämma kiräkle qayber adımnar inde yasaldı. Bügen menä bez Boratınski muzeenda räxätlänep küreşä alabız. Yäşlärgä, balalarğa xämerneñ zıyanın añlatu öçen alarğa taralıp betkän böer-bawırlarnı kürsätmilär, ä alarnı Derjavin häykäle, Boratınski muzee - iñ yuğarı qimmätlär tuplanğan urınğa kiterdelär.

Al'bina Zäynulla

XS
SM
MD
LG