Accessibility links

Кайнар хәбәр

Rayon başlığı urınbasarı rişwätçe?


Düşämbedä Tatarstannıñ yuğarı mäxkämäsendä 49 yäşlek Xämzä Kaşapovnıñ cinayät eşen tikşerü häm qarar qabul itü yabıq işeklär artında ütä. Jurnalistlar anda kertelmi. Bu cinayät eşe ikençe köngä genä yabıq işeklärdän çitkä çığa. Bez Tatarstan yuğarı mäxkämäsenä şaltırattıq alar Kaşapovnıñ cinayät eşe turında radioğa añlatma birüdän baş tarttılar. Mäxkämä qarar qıldı, ul şartlı räweştä 5 yılğa iregennän mäxrüm itelde digän mäğlümat birdelär. Çistaynıñ elekke xakimiät başlığınıñ qırın eşläre bolardan ğibärät buldı. Xämzä Kaşapov mäxkämä süz birgäç tä: “Min ğayıple tügel, barı eşmäkärlärdän qayçandır eşmäkärlekne cayğa salu öçen birep torğan aqçalarnı kire aldım!” – digän. Şuşı süzlärne äytkännän soñ 6 säğätlek tänäfes iğlan itelä häm qarar çığarıla. Elekkege rayon xakimiäte başlığı urınbasarı; “Zur külämdä rişwät alu” häm “Xakimiättäge urınınnan tieşsez räweştä, qanunnı bozıp qullanu” dielgän matdälär buyınça ğayıplänelä. Şartlı räweştä 5 yıldan iregennän mäxrüm itelüdän tış, ul 3 yıldan artıq waqıt ütkäç kenä däwlät oyışmalarında idäräçe bulıp eşli alaçaq. Xäzer Kaşapovnıñ cinayät eşen Çistay yaqlarına qaytıp tikşerik. Ul 1992 yılda Çistay rayon xakimiäte başlığı urınbasarı itep bilgelänelä. Kaşapov rayondağı eşmäkärlekne üsterü, bazar mönäsäbätlären caylaw mä’sälälären üz östenä ala häm Çistaynıñ säwdägärläre belän elemtälär caylıy başlıy. Elekkege rayon xakimiäte başlığı urınbasarı säwdägärlärneñ byudjetqa aqça küçerülären dä kontrol'dä tota. Waqıt ütü belän Kaşapov Çistay säwdägärlärenä üzeneñ şäxsi taläplären dä quya başlıy. Aña tülärgä telämägän eşmäkärlärne “zur qıyınlıqlarığız bulırğa mömkin” dip tülärgä etärä. Menä Çistaynıñ yağulıq maylaw materialları belän alış-bireş itüçe säwdägär ay sayın Xämzä Kaşapovqa 300-400 litr benzin birergä häm Qazan däwlät universitetınıñ yuridik bülegendäge ulınıñ uquı öçen tülärgä tieş bula. Şul uq rayonnıñ аудіо - wideo cihazlar belän säwdä itüçe eşmäkär 4 yıl buyı, ay sayın ul waqıttağı rayon başlığı urınbasarına 10-20 meñ aqça birep bara. Menä şul eşmäkär Kaşapov äfändene sata da inde. Qulğa alınğaç ğayıple keşe: “Ul miña aqça birergä tieş ide, şul aqçalarnı birmäs öçen maxsus xoquq saqçılarına çıqtı ”- di. “Azatlıq”nıñ “açıq mikrofonı”na Qazanda toruçı ber abzıydan baylar-yarlılar turında soraştıru alğanda, “Xäzer eşläp tügel, talap qına bayıp bula torğandır inde ul” – digän ide. Älege oçraq abzıynıñ äytkän süzlärenä dälil tügelme soñ? Tatarstannıñ rayon başlıqları, urınbasarların uyın avtomatları turında söyläşkändä dä Prokuror Qafil Ämirov, berençe vitse-premyer Rawil Moratov yış iskä alalar. Uyın avtomatların qısqartu, şähär, rayon üzäklärennän çitkä küçerü eşe başlanuğa qaramastan, 28 avgustta Arçada yaña uyın salonı açılğan. Bu xaqta işetügä Rawil Moratov rayon başlıqları belän uyın säwdäsen cayğa salu xaqında barğan soñğı cıyılışta:“ Ägär sezneñ borın astında mondıy eşlär eşlänelä ikän, bez monı rişwätçelek dip qabul itäçäkbez häm tieşle cäzasın da biräçäkbez. Uyın säwdäsen totuçılar arasında rayon başlıqlarınıñ tuğannarı, tanışları buluı da ser tügel!” – digän süzlären yış qabatladı. Qafil Ämirov tä rayon başlıqların, urınbasarların bu süzlärgä qolaq salırğa çaqırdı. Röstäm İsxaqi
XS
SM
MD
LG