Accessibility links

шимбә, 10 декабрь 2016, Казан вакыты 05:59

Tatarstannıñ salım xezmäte sorı bazar belän köräşä


Xalıqnı borçığan mäsäläläneñ berse ul xezmät xaqı. Tögälräge tübän xezmät xaqları. Tatarstanda ütkärelgän qaynar elemtä näticäsendä respublikada keşelärgä yäşäw minimumınnan da tübän xezmät xaqın tülägän 8 meñnän artıq oyışma açıqlanğan. Xäzer şul xaqta tulıraq itep.

Tatarstannıñ salım xezmäte idäräse ütkärgän qaynar elemtägä 120dän artıq şaltıratu qabul itelgän. Xalıqnı eşkä urnaşqanda räsmi bulmağan xezmät mönäsäbätläre, eş xaqın totqarlaw, sotsial' yaqlanmaw, pensiä häm sotsial' waqiflarğa aqça küçerüdä aldaw oçraqları bik borçıy.

Elegräk bu mäs'älälär belän respublikanıñ salım inspeksiäse, eçke eşlär ministrlığı, xezmät häm mäşgul'lek ministrlığı, pensiä waqife, sotsial' iminiät idäräläre häm prokuratura şöğellänä ide. Xäzer isä sorı xezmät bazarına qarşı salım xezmäte idäräse dä köräş “iğlan” itte. Döresräge eş xaqların räsmiläşterü belän Rusiä federal' salım xezmäte şöğellänä başladı. Häm näq şundıy uq komissiälär barlıq cirle oyışmalarda da buldırıldı.

Salım xezmäte tikşerüeneñ näticälärenä kilgändä, alar Tatarstanda 8 meñnän artıq oyışmanı açıqlağan. Ämma bu artta qalğan oyışmalar tügel, ä äybät kenä eşläp kilüçe şirkätlär. Tik xezmätkärlärgä tülängän xezmät xaqları bik tübän. Xätta yäşäw minimumınnan da azraq. Tikşerülär şunı kürsätkän - älege küreneşlär ayırım ölkälärgä xas. Süz uyın biznesı, transport, tözeleş häm xezmät kürsätü ölkäläre xaqında bara. Çönki näq anda aqça äyläneşe, salım tüläw sisteması şirkätneñ kereme külämenä bäyle tügel. Häm şuña kürä eşçelärne aldaw oçraqları kilep çığa. Älege ölkälärdä eş birüçe yış qına räsmi eş xaqı bilgelämi häm dä pensiä, sotsial' iminiät waqiflarına aqça küçermi.

Açıqlanğan oyışma wäkilläre cirle salım xezmätlärenä çaqırıla häm alar xezmät xaqın kütärü turında uylarğa häm monı ğämälgä kertergä tieş.

Respublikanıñ salım xezmät idäräse mäğlümat bülege xäbär itüençä, komissiägä çaqırılğan ike meñ oyışmanıñ här dürtençese xezmät xaqı mäs’äläsen tikşergän. Dürt oyışma häm sigez eşmäkärneñ keremne yäşerüe häm konvertlı eş xaqı birüe açıqlanğan. Salım xezmäte uzdırğan qaynar elemtä terkälmiçä genä eşmäkärlek belän şöğellänep, xezmätkärlärenä räsmi bulmağan xezmät xaqı tüläwçelärne oyışmalarnı açıqlarğa yärdäm itkän. Älege materiallar salım inspeksiäseneñ rayonnardağı büleklärenä tapşırılğan.

1 sentäberdän Qazanda häm Yar Çallı şähärlärendä räsmi bulmağan eş xaqların açıqlaw häm alarnıñ külämen arttıru buyınça aylıq bara.

Al'bina Zäynulla

XS
SM
MD
LG