Accessibility links

Кайнар хәбәр

Bush: Amerika sivilizatsiä öçen suğışa


Uzğan töndä Quşma Ştatlar prezidentı George Bush 11 Sintäber höcümnäreneñ 5 yıllığı uñayınnan amerikan televideniesendä yasağan çığışında terrorğa qarşı suğışnı sivilizatsiä öçen köräş dip atadı. Amerikanıñ Yaqın könçığışta demokratiä tözü niäten iskärtep ul, Ğiraqta tulı demokratiä häm tınıçlıq urnaşmıy torıp annan ğäskärlärne çığarmasqa wäğdä itte.

11 Sintäber höcümnärenä 5 yıl tulğan könne amerikan prezidentı George Bush terrorğa qarşı suğışqa yaña bilgelämä birep anı sivilizatsiä öçen köräş dip atadı:

"Bu köräş sivilizatsiälär bäreleşe dip ataldı. Çınbarlıqta ul sivilizatsiä öçen köräş. Bez irekle xalıqlar telägänçä yäşäw räweşe öçen köräşäbez. Yaqın könçığıştağı yaxşı niätle keşelär ireklek, çıdamlıq, ixtiramğa nigezlängän cämğiät tözi alsın öçen" di amerikan prezidentı.

Bushnıñ 18 minutlıq bu çığışı iñ qaralğan waqıtta tapşırıldı. Amerika kanalları ağımdağı tapşıruların tuqtatıp tordı. Çığışınıñ başında ul 5 yıl elek bulğan höcümnärneñ 3 meñgä yaqın qorbanın iskä aldı, annarı terrorğa qarşı suğışqa küçte:

"Bezgä qarşı torğan doşman bezgä ülem ğazap kiterergä teli. Amerika bu suğışnı telämäde, här Amerikan anıñ betüen teli, min dä şulay. Läkin suğış äle betmägän, ul yä bez, yä ekstremistlar ciñüe belän betäçäk. Doşmannı xäzer ciñmäsäk, bez balalarıbızğa Yaqın könçığığşta terrorçıl däwlätlär, atom qoralı belän qorallanğan diktatorlar qaldıraçaqbız. Bu suğış yaña ğasırnıñ yünäleşen, dönyadağı millionlağan keşeneñ yazmışın bilgeli" di amerikan prezidentı.

Yärdämçelär säyäsätkä qağılmasqa kiñäş itsä dä, bu çığış Bush öçen millionlağan saylawçığa möräcäğät itü forsatı ide. Kiläse saylawlarğa 8 atna waqıt qalıp bara, soñğı fiker beleşülärgä qarağanda, amerikannarnıñ kübese terrorğa qarşı suğış belän qänäğät tügel, Ğiraqtağı suğışqa qarşı.

Bush, berençe tapqır, Äfğanstan belän Ğiraqta häläk bulğan amerikan xärbiläre sanın iğlan itte: 2999. Yağni, bu san 11 Sintäber höcümnärendä häläk bulğannardan da artıp kitkän.

Ğiraqta küpläp üterü qoralı tabılmadı, Saddamnıñ Äl-Qaidä belän bäyläneşe yuq, ni öçen Amerika Ğiraqta suğış başladı digän, köçäyä barğan sorawlarğa, Bush berençe tapqır cawabın birde:

"Minnän yış qına, Saddamnıñ 11 Sintäbergä ber qatışı da yuq, ni öçen bez Ğiraqqa kerdek, dip sorıylar. Cawap şul: Saddam açıq yanaw ide. Monı minem administratsiä, Kongress, Berläşkän Millätlär kürde. 11 Sintäberdän soñ dönya Saddam rejimı tudırğan qurqınıç belän kileşä almıy ide" di amerikan prezidentı.

Ğiraqtan ğäskärlärne çığarırğa çaqıruçılarğa Bush mondıy cawap birde:

"Eşne betermiçä bez annan kitmibez. Ğiraqta nindi genä xatalar yasalğan bulmasın, bez annan kitsäk, terrorçılar bezne qaldırır dip uylaw – iñ zur xata bulır ide. Alar bezne qaldırmayaçaq, arttan iärep baraçaq. Amerikanıñ iminlege Bağdad uramnarındağı suğış näticäsenä bäyle" di amerikan prezidentı.

Bush bu mäsälädä ildä tirän büleneş buluın tanıdı häm 8 atnadan üzgäreşlär öçen tawış birergä cıyınuçılarnı, qarşılıqlarnı çitkä quyıp, urtaq doşman aldında berläşergä çaqırdı. Çığışın ul, ägär bez terrorğa qarşı suğışnı ciñep çıqmasaq, bu eş bezneñ balalarğa qalaçaq, di beterde.

Ali Ğilmi
XS
SM
MD
LG