Accessibility links

якшәмбе, 11 декабрь 2016, Казан вакыты 13:06

Uquıñ öçen tüli almasañ, eşläp uqıp bula


Yuğarı uqu yortında tüläwle belem alu – härkemneñ dä köçennän kilmi. Talantlı häm aqıllı bulsañ da, aqça kiräk xäzer. Bigräk tä awıllardan kilüçe yäşlärgä awırğa turı kilä. Üzläre telägän hönärgä öyränü öçen, uqudan buş waqıtta törle eşlärdä aqça yünätergä mäcbür bula alar.

Qazan däwlät texnologiä universitetında isä älege problemanı başqaçaraq xäl itkännär. Uquları öçen tüli almağan studentlarğa universitetta eş täqdim itälär. Bu xaqta tulıraq itep, Qazan däwlät texnologiä universitetınıñ uqıtu bülege citäkçese İlnur Abdullin bolay dide.

Bezdä konkurslar bik küp. Küp kenä belgeçleklärdä mondıy ğına tügel, ä medalistlarnıñ konkursı. Şuña kürä awıl cirlärennän kergän küp kenä talantlı yeget-qızlar tüläwsez uqırğa kerä almıylar. Urınnarıbız da citmi. Menä şul talantlarıbıznı yuğaltmasqa dip inde, bez alarnı tüläwle törkemnärgä alabız. Ämma tüläwläre urınına alar üzläre eşlilär. Şunıñ belän bez ike mäsäläne xäl itäbez: talantlı yäşlärne uqıtabız, annarı üzebezneñ dä öyne cıyıştırabız. Menä bu eşkä alına torğan yeget-qızlar az tülänä torğan eşkä urnaşalar bit. Alar uram cıyıştıruçı, vaxterlar bulıp eşlilär, saqta toralar. Aylıq xezmät xaqı meñnän artmıy inde. Yılına un-unike meñ eşläsälär, qalğanın universitet üze tüli. Töp belgeçleklärdä uqu bezdä yegerme biştän qırıq meñgä tikle tora. Bıyıl inde ber çığarılış buldı, altı yıl elek eşlägän idek bez bu eşne.

İlnur Abdullin süzlärenä qarağanda, älege forma buyınça uqu yortınıñ barlıq büleklärenä dä kerergä bula. Xäzerge waqıtta universitetta bolay itep 200 gä yaqın student uqı. Tüläp uquçılarğa qarağanda, eşläp belem alırğa teläwçelär kübräk ikän. Ämma barısına da urın yuq, dide ul.

Mäsälän, bezgä 50 cıyıştıruçı quyılğan ikän, bez bit inde alarnı kübräk ala almıybız. Ä tüläwçelär küp. Çiratqa basalar.

Döres, uquları öçen tüli almağan studentlarğa bulışunıñ ikençe yulı da bar. İlnur Abdullin bolay dip äytte.

Ber professor yäisä fänni citäkçegä barabız da, şundıy balanı uqıtıp çığar äle dip sorıybız. Älbättä, studentnı uqıtu anıñ üz kesäsenä töşä. Ämma andıy misallar bar bezdä.

Ämma eşläp uqırğa da barlıq studentlarnı almıylar. Uqıtu häm tärbiä komissiäse yıl däwamında yaxşı bilgelärenä genä uquçılarnı, yäisä matdi xäle naçar bulğan studentlarnı täqdim itä.

Alarnı bezgä uqıtu-tärbiä bülege, yäisä studentlarnıñ komitetı saylap birä. Matdi xäle naçar bulğan studentlarnı kübräk alabız inde bez. İkegä uqığannar anda tormıy. Dekanatlar yartı yıl sayın eş urınınnan niçek eşläwläre xaqında, ä eş urınınnan niçek uquları xaqında beleşmä sorıylar. Şul ike yünäleştä totabız inde bez alarnı.

Bolay eşläp uquçı studentlar belän bez üzebez dä söyläşep qararğa, alarnıñ fikerlären belergä buldıq.

- Ölgerergä turı kilä inde. Niçek kenä bulmasın, tüläwledä dä uqığaç, gel äti-äni cilkäsendä genä yatıp bulmıy, eşlärgä turı kilä. Läkin bik awır.

- Awır, läkin nişliseñ inde. Tüli almağaç, eşlärgä turı kilä.

Universitetqa uquları öçen xezmät belän tüläwçe studentlarnıñ fikerläre bu. Eşneñ ciñel bulmawın añlıy alar, ämma eştän qurqıp tormıy. Studentlarnıñ berse äytkänçä, olı tormışqa şulay iäläşälär.

Güzäl Zıyätdinova

XS
SM
MD
LG