Accessibility links

җомга, 9 декабрь 2016, Казан вакыты 22:28

Qazanda Mozart muzıka festivale açıldı


2006 yılda dönya Motsartnıñ tuuına 250 yıl tuluın bilgeläp ütä. UNESCO bu yılnı Motsart yılı dip iğlan itte. Yubileynı Tatarstan da iğtibarsız qaldırmadı. Şul säbäple Motsartnıñ muzıkasına bağışlanğan xalıqara festival' oyıştırıldı. Ä bu festival'ne oyıştıruda başlap yörüçe - muzıkant, dirijer Röstäm Abyazov.

Tatarstanda bu 2006 yıl, ädäbiät häm sänğät yılı bularaq bilgeläp ütkärelü säbäple, Tatarstan citäkçeläre, häm anıñ mädäniät ministrlığı dirijernıñ initsiativasın tormışqa aşırırğa yärdäm itte.

Röstäm Abyazov Motsart turında bolay dide :

“Minem öçen Motsart , härber muzıkant öçen bulğan kebek ük – ul genial', dahi kompozitor. Bälki, xätta bu cir yözendä dahilardan da dahi muzıka yazğan kompozitor”,-dide ul .

Böten dönyağa tanılğan avstriä kompozitorı Motsartnıñ muzıkasın tıñlaw, tatarlarğa ni birä, häm anıñ ähämiäte närsädä digän sorawğa Röstäm Abyazovnıñ cawabı menä şundıy buldı:

“Ägär dä tatarlarnı ğomumi itep alsaq, min äytä almıym, tatarlar bügenge köndä klassik muzıkanı yaratıp tıñlawçan xalıq, dip.

Minem uylawımça, bälki şuşı Motsart muzıkası tatar millätenä klassik muzıkanı tıñlarğa, anı yaratırğa nindider ber etärgeç, yärdäm bulır. Ä monıñ öçen bu muzıkanı, ber genä märtäbä bulsa da , işetergä kiräk.

Qızğanıçqa qarşı, bügenge köndä, tatarlar, ciñel qabul itelä torğan “Zur konsertlar”nı, estrada konsertların tıñlarğa yaratalar. Ä andıy konsertlardağı köylärne tıñlaw, ziräklekne taläp itmi, häm aqıl xezmäten dä eşkä cikmi.

Ägär dä, alğa taba da şulay barsa, tatar milläteneñ intellekt däräcäseneñ üseşe häm anıñ başqa yaqlarınıñ üseşe dä, bez telägän tizlek belän alğa kitmäyäçäk”,- dide Röstäm Abyazov.

Häm menä 13 sintäberdä bu festival'neñ ikençe köne. Festival'gä kilgän qunaqlar törle illärdän, şähärlärdän. Anıñ programması da bik üzençälekle.

Berençe könne festival' Röstäm Abyazov citäkçelegendäge Qazan däwlät kamera orkestrı, “La Primavera” başqaruında “Figaronıñ tuyı” operasınıñ kereş muzıkasınnan başlanıp kitkän ide.

13 sintäberdä S. Säydaşev isemendäge zur konsert zalında Mäskäwdän kilgän qunaqlar çığış yasadı. Anda bügenge köndä Rusiäneñ iñ tanılğan häm iñ yaxşı başqaruçılardan sanalğan Raxmaninov isemendäge kamera ansamble çığış yasadı. Alar Motsartnıñ öç muzıka qoralı öçen yazılğan kamera äsärlären başqardılar. Motsartnıñ äsärlären tamaşaçı Viktor Yampol'skiynıñ fortepianoda, Mixail Sinmannıñ skripkada, Natal'ya Savinovanıñ violonçel'dä başqaruın tıñladılar.

16 sintäberdä festival' tämamlanaçak. Anıñ yomğaqlaw konsertında Tatarstannıñ däwlät simfonik orkestrına quşılıp, “Mäskäwneñ xor ostaları” çığış yasayaçaq. Anda şulay uq tamaşaçı Mäskäwdä yäşäwçe bik yuğarı (soprano tawışlı Ol'ğa Çibisova belän tenor, Marat Galiaxmetovnı da, şulay uq Avstraliädän kilgän Rozalin Krelnı da tıñlaw bäxetenä ireşäçäk.

Mälikä Basıyr

XS
SM
MD
LG