Accessibility links

җомга, 9 декабрь 2016, Казан вакыты 01:16

Qazan şähäre Turinda täqdim itelde


Sişämbe könne respublika premier-ministrı Röstäm Miñnexanov Turin şähärendä bulıp qayttı. Xäbär itkänebezçä, anda studentlarnıñ xalıqara sport berlege oyıştıra torğan universiadanıñ 2007 yılnıñ qışında uza torğanın täqdim itü uza. Tatarstan başqalası älege universiadanıñ cäygesen 2011 yılda üzendä ütkärergä teläk belderde. Qazannan tış nämzätlär arasında Qıtay, İspaniä, Polşa şähärläre dä bar. Turinda şuşı könnärdä saylap alu komissiäse äğzäläre universiadanı oyıştırırğa teläwçe nämzätlär belän dä tanışa. Respublika, Qazan xakimiäte wäkilläre şähär, respublika xaqında söyläde, videotasmalar aşa Tatarstan häm anıñ başqalası belän tanışırğa mömkinlek birde, bulaçaq universitet awılı belän tanıştırdı. Bu xaqta Turinnan telefon aşa bez Tatarstannıñ Yäşlär eşläre, sport häm turizm ministrı Marat Barievtan soraştıq.

Bezneñ monda kilüebezneñ töp maqsatı – studentlarnıñ xalıqara sport berlege citäkçelege häm äğzälären Qazan, Tatarstan, ğomumän, Rusiädä studentlar arasında sport yünäleşe belän tanıştıru. Bez kürgäzmä oyıştırdıq. Ul bik oşadı, anıñ buyınça küp kenä sorawlar birdelär. Qazannıñ şansları turında älegä qıyın. Çönki anda bezdän başqa da bik däräcäle nämzätlär bar. Läkin, minemçä, bezneñ dä ciñü mömkinlege bik zur.

12 sentäberdä Turinda respublika wäkilläre studentlarnıñ xalıqara sport berlege citäkçelege belän oçraştı. Marat Bariev däwam itä.

Studentlarnıñ xalıqara sport federatsiäse citäkçeläre sport ölkäsendä bik bilgele häm abruylı şäxeslär. Menä şular belän oçraştı Tatarstannıñ premyer-ministrı Röstäm Miñnexanov häm Qazan başlığı İlsur Metşin. İke yaq ta älege oçraşu, anıñ näticäläre belän qänäğät qaldı.

Tatarstannıñ Yäşlär eşläre, sport häm turizm ministrı Marat Barievnı Turinda Tatarstan wäkilläreneñ närsä eşläp yörgäne xaqında Azatlıqqa menä şularnı citkerde.

Gölnaz İlgizär

XS
SM
MD
LG