Accessibility links

пәнҗешәмбе, 8 декабрь 2016, Казан вакыты 10:56

Baliğ bulmıyça öylängän Omski yäşläre


Mäğlüm ki, Rusiä qanunnarı buyınça 18 yäşen tutırğan yeget häm qız ğailä qorırğa xoquqlı. Ämma, äle bu yäşkä citmägän, yäğni baliğ bulmağan yäşlärneñ nikaxlaşıp, tormış itä başlawları da bilgele. Andıylarnı oçratqanda ireksezdän bu yäşlär niçek yäşäp kitkännär, tormışlarında awırlıqlar oçrağanmı, alar nıqlı ğailä tözi alğannarmı kebek sorawlar tua.

Omski yağında da baliğ bulmıyça öyläneşkän yäşlär yuq tügel. Aralarında tatar yegetläre häm qızları da oçrıy. “Azatlıq” tıñlawçıların andıylar belän yaqınraq tanıştırırğa niätläp, ber-niçä ğailägä möräcäğät itep qaradıq. Ämma, nigäder, alarnıñ berse dä mikrofonğa söylärgä telämäde. Şulay da qayberäwläreneñ äniläre, tuğannarı belän söyläşü mömkinlege buldı. Äñgämälär, ğomüm alğanda, yäşlärneñ tormış itä başlawlarınıñ ciñeldän bulmawın, qayber oçraqta xätta faciğağa dä alıp baruın kürsätte. Awırlıqlarnı ciñep, yaxşı ğına tormış qorıp cibärgännäre dä oçradı. Gölnara belän Ruslan Mostafinnar ğailäse şundıylardan dip äytergä mömkin. Öyläneşkändä Gölnarağa 17, Ruslanğa 23 yäş bula. Bu ğailädä dä problemalar bulmıy qalmağan, ämma yäşlär alarnı xäl itärgä tırışqan. Alar başta kilenneñ änise öyendä yäşägännär, berniqädär waqıt uzğaç, üzlärenä yort tözü eşenä kereşkännär. Yäşlärgä banktan kredit alırğa turı kilgän. İkese bergä tözep çıqtılar, - di Göl'naranıñ änise İl'hamiä xanım. Ä bergä torğanda, törlese bula ide, açulanışqan waqıtları da buldı. Üz öylärenä küçkäç, mine qaya utırtırğa belmilär, kilsälär dä, kitsälär dä, äni dip kenä toralar, -di. Fatirları bulğaç, yäşlärneñ tormışı uñay yaqqa üzgäreş alğan diärgä mömkin.

Ä menä Omskida yäşäwçe 17 yäşläre dä tulmıyça öyläneşkän Rimma belän Renat Zaripovlarnıñ ğailä tormışı faciğale bulıp çıqqan. Nikaxtan soñ ozaq waqıt ta ütmi, alarnıñ ulları tuğan. Ämma yäş äti äle üzen ğailä başlığı dip xis itmägän, anıñ iptäşläre belän küñel açası kilgän. Rimmanıñ tuğannan tuğan apası Gölfirä xanım süzlärençä, Renat iptäşläre belän diskotekağa barırğa telägän. Ber yäşlek näni ulların qarawda yärdäm kötep, Gölnara anı diskotekağa cibärmägän. İre açuınnan işek aldına çıqqan da, asılınğan.

Qızğanıçqa qarşı, mondıy faciğä ber Rimma belän Renat ğailäsendä genä tügel. Ölkädäge tatar awıllarınıñ bersendäge yäş ğailälärdä kilep çıqqan awırlıqlar tağın 5-6 irneñ ülemenä säbäp bulğan. Yäşli ğailä qorğan irlärneñ qayberläre xatınnarı belän az ğına açulanışsalar da, asılınıp ülgännär.

Menä şundıy bäxetsezleklärgä dä alıp bara qayber oçraqta yäşli öylänü. Äle baliğ bulmağan, ämma inde tormış qorırğa niätlängän yäşlär “Ğailäne alıp barırğa min äzerme?”, digän sorawğa tağın ber qat cawap ezläsen ide.

Saniä Mirxaleeva, Omski

XS
SM
MD
LG