Accessibility links

якшәмбе, 11 декабрь 2016, Казан вакыты 07:18

Rusiäneñ Üzäk Bank räsmie atıp üterelde


Rusiäneñ Üzäk Bank räise urınbasarı Andrei Kozlov, aña yasalğan höcümnän soñ berniçä säğät ütügä, atnakiç irtäsendä xastaxanädä wafat buldı. Tikşerüçelär monı yallap üterü dip bäyäli häm bankirnıñ eşçänlege belän bäyli. Andrei Kozlov Rusiäneñ "qarañğı" bank sistemasında tärtip urnaştıru belän şöğellängän bulğan.

41 yäşlek Andrei Kozlov bu wazifasında 4 yıl eçendä şaqtıy zur ixtiram qazanıp ölgergän. 4 yıl elek Üzäk bank räise urınbasarı itep bilgelängäç ul bank sistemasında aqça yuular häm başqa qanunsız ğämällärgä qarşı ayawsız köräş başlap cibärgän. Bu yılda ğına 44 banknıñ litsenziäse alınğan. Rusiädä alar barlığı 1200.

Kozlovnı şähsän belgän bankirlar anıñ üterelüeneñ professional eşçänlege belän bäyle buluda şiklänmi. Rusiä Bankları Berläşmäse başlığı Garenin Tosunian, radiobızğa äytüençä, 4 yıl eçendä Kozlov şaqtıy küp doşman tuplağan:

"Ul bank ölkäsendä kontrol öçen cawap birgän, anı ütä kürenmäle itü öçen, soñğı yıllarda kisken üzgäreşlär başqarğan keşe ide. Ällbättä andıy keşeneñ doşmannarı bula. Bu şunıñ belän bäyle" di Banklar Berläşmäse başlığı.

Çärşämbe kiçendä bankirlar arasında futbol uyınınnan qaytıp barğanda Kozlovqa ike bilgesez keşe atqan. Yörtüçese şunduq häläk bulğan, Kozlov isä başına häm kükrägenä awır cäräxätlär alğan, yaqındaığ xastaxanägä kiterelgän. Tabiplar aşığıç operatsiä yasağan, läkin ğömeren saqlap qala almağan.

Andrei Kozlov soñğı berniçä yılda Rusiädä üterelgän iñ yuğarı räsmilärneñ berse buldı. Bu xäl ildäge iminlek häm totrıqlılıqqa künegä başlağan eşquar wä säyäsmännärne şaq qattırdı.

Bügenge xökümät utırışın premier-minisrı Mixail Fradkov Andrei Kozlovnı iskä aludan başladı:

"Bu zur yuğaltu, Üzäk bank citäkçeläreneñ berse, bezneñ kollega, 3 balası qaldı, tormış iptäşeneñ, tuğannarınıñ, yaqınnarınıñ qaysın urtaqlaşam" Rusiä premier-minisrı.

Eçke Eşlär ministrı Räşit Nurğaliev tikşerüneñ iñ yuğarı däräcädä ütkäreläçägen äytte. Baş prokuror Yuri Çaika tikşerüne üz kontrolenä aldı.

Kozlovnıñ kollegaları bu Rusiäneñ bank sisteması öçen zur yuğaltu di:

"Şuşı wazifada eşlägän däwerdä ul kontrolne bik yaxşırtı. Bank sisteması ütä kürenmäleräk buldı, bu anıñ wazifası da, xıyalı da ide. Ul zur uñışqa ireşte, anıñ eşlägänen añlarğa äle berniçä yıl kiräk bulır" di Dumaıñ bank eşläre komitetı başlığı Pavel Medvedev.

Finans ministrı Aleksei Kydrin da Kozlovnı finans cinätälärenä qarşı köräşneñ başında torğan batır häm ihlas keşe dip atadı.

Uzğan atnada ğına Soçida ütkän ber cıyında Kozlov, aqça yuu ğämällärendä totılğan bankirlarğa bank sistemasında eşläwne ğömer buyına tıyarğa täqdim itkän ide.

Ali Ğilmi
XS
SM
MD
LG