Accessibility links

сишәмбе, 6 декабрь 2016, Казан вакыты 18:56

Başqortstan neft şirkätlären Rosneft yotarmı?


Soñğı könnärdä Başqortstannıñ neft' eşkärtüçe şirkätläre tiräsendä yaña imeş-mimeşlär tarala başladı. Qayber küzätüçelär farazlawınça, Başqortstan neft' eşkärtü tarmağı şirkätläre aksiälären Rusiäneñ kiñ bilgele ber monopolistı – “Rosneft'” şirkäte üz qulına töşerergä cıyına ikän. Xäyer, bu inde farazlar däräcäsendä genä dä tügel, çönki mondıy ixtimallıqnı “Rosneft'” citäkçeläre üzläre dä kire qaqmıy ğına tügel, ä bu yünäleştä söyläşülär başlanuı xaqında da äytä ikän.

Başqortstan citäkçeläre häm respublika neft' şirkätlären üz qulında totuçı Ural Räximov, yäğni prezident Mortaza Räximovnıñ ulı bu adımğa barırğa telämi ikän. “Rosneft'” tarafınnan yotılsa, moñarçı Başqortstan neft’ennän fayda kürüçe respublika aksionerları küp närsä yuğaltaçaq. Ä aqça yuğaltu xakimiätne dä qaqşatu digän süz.

Elektän dä mäğlüm buluınça, Başqortstan neft' eşkärtü tarmağı şirkätlären üz qullarına töşerergä teläwçelär baytaq. Federal' üzäkneñ tayanıçı, Kreml'neñ aqça yançığı bulğan “Gazprom”nıñ da Başqortstan neft' zavodların üz qaramağına küçerergä cıyınuı mäğlüm. Niçek kenä bulsa da, Başqortstan neft' eşkärtü şirkätläre yazmışı bu yıl azağınaça xäl iteläçäk, dip kötelä. Bu xaqta respublikadağı kiñ bilgele iqtisatçı, professor Rinat Ğatawllin da belderä. Anıñ süzlärençä, äle Başqortstannıñ şuşı tämle bäleşen Mäskäwdä büleşü bara. “Moña inde Başqortstan xakimiätläre berniçek tä qarşı tora almayaçaq”, - di ul.

XS
SM
MD
LG