Accessibility links

пәнҗешәмбе, 8 декабрь 2016, Казан вакыты 10:54

Azatlıq xäbärçese üleme uñayınnan xalıqara xoquq yaqlaw oyışmaları borçılu belderä


Pänceşämbe könne Törekmänstan törmäsendä Azatlıq radíosı xäbärçese Ögülsäpär Moradova ülüe turında xäbär itelde. Çiklären tanımağan jurnalistlar oyışması Moradovanıñ üleme turında mäğlümat birüne taläp itep Parijda Törekmänstan ilçelege qarşında uram cıyını ütkärde. Xalıqara xoquq yaqlaw oyışmaları da bu xälgä borçılu belderde.

Parijdağı Törekmänstan ilçelege qarşına Çiklären tanımağan jurnalistlar oyışmasınıñ 30 lap wäkile kilgän ide. Törekmän ilçeseneñ alar yanına çığuın taläp itte. Fransia politsiase uram cıyının tarattı. Çara aldınnan oyışma äğzası Elza Vidal anıñ maqsatları turında bolay dip äytte: “Bez bügen biregä üterüçelärneñ cäza aluın taläp itär öçen cıyıldıq. Hiç yuğı bu xaqta bez däşmi qalırğa tieş tügel”.

Törekmän räsmiläre Moradovanıñ üz üleme belän ülgänen xäbär itsä dä, keşe xoquqları oyışmaları moña ışanmıy. Moradovanıñ balaları da morgta äniläreneñ mäyeten kürgäç, anıñ muyınında nindider ezlär häm başında zur yara bulğanın äytkän ide. Törekmän Xelsinki waqıfı citäkçese Tacigöl Bikmedova, Moradovanıñ üterelgän buluına dälillär bar dip belderde. “Azatlıq radíosı xäbärçese häm keşe xoquqları aktivistı Ögülsäpär Moradova säyäsi maqsatlardan üterelgän. Anı köç qullanıp häm ğazaplap ütergännär. Moña dälilär bar,- dide Bikmedova.

Baş fatírı Venada urnaşqan Xalıqara Xelsinki federatsiase başlığı Aaron Rodes ta şundıy uq fikeren belderde. Nyu-Yorkta urnaşqan jurnalistlarnı yaqlaw komitetı Törekmän räsmiläreneñ yäşeren ğämälläre şik tudıra dip belderde. Londondağı Ämnesti İnterneşnel, Moradovağa qarşı köç qullanğan bulu ixtimalı borçılu tudıra, dip yazıp çıqtı.

58 yäşlek Ögülsäpär Moradova yün ayında qulğa alındı. Anıñ yanına advokatlarnı kertmädelär. Xoquq yaqlawçılar belderüençä, “cimerü eşçänlege alıp baruın tanısın öçen” anıñ aqılına zäğıyflek kiterä torğan matdälär qullanılğan. Avgust ayında anı Törekmänstan mäxkämäse qanun bozıp qoral saqlawda gepläp 6 yılğa iregennän mäxrüm itkän ide.
XS
SM
MD
LG