Accessibility links

җомга, 9 декабрь 2016, Казан вакыты 03:12

Helsinkida Tuqay kiçäse


Sänğät häm ädäbiät yılı Tatarstanda, Rusiädä genä tügel, başqa illärdä dä däwam itä. Ütkän şimbädä fin tatarları da Tuqay kiçäse uzdırdılar. Kiçägä xalıq Helsinkidan ğına tügel, Yarvinpä, Turqu, Tampere häm başqa şähärlärdän kilgän idelär. İñ şatlandırğanı şul: kiçäne äzerläwçe häm uzdıruçılar yäşlär häm balalar idelär.

Fidä Xäyrulla başta şağirneñ tormış häm icat yulı belän tanıştırdı. Balalar äzerlägän ädäbi-muzıkal kompozitsiä video materiallar belän aralaşıp bardı. Muzıkantlar Dänis abıyları Bädretdin häm Batu abıyları Alqara balalarğa yärdäm itep, därtländerep tordılar. Fidä Xäyrulla cämğiätneñ eşçänlege turında qısqaça xisap ta birep kitte.

Aldan iğlan itelgän şiğerlär bäygesenä yomğaq yasaldı. Anda Osman abıy Äbdräxim ciñüçe dip tabıldı. Jüri Zäkiä Xäyrullanıñ icatına da yuğarı bäyä birde.

Annan barça xalıq Raif Nizametdin häm yäşlär muzıkal törkemenä quşılıp küñelläre bulğançı cırlaşıp utırdı.

Kiçä axırında Fidä Xäyrulla, tizdän başlanaçaq uraza ayın iskä alıp, Ğabdulla Tuqaynıñ "Qader kiçen" uqıdı.

Rusiädä Tatarstannan çittä yäşäwçelär belän oçraşqanda, ğädättä balalar telne belmilär, öyränergä dä telämilär, ni eşlärgä dä belmibez dip zarlanırğa yaratalar. Anıñ ısulı ber genäder inde ul: öydä bala belän üz teleñdä söyläşü, kitap uqu, şiğerlär öyrätü. Menä bit Kamil belän Aslan Ali Tuqay şiğerlären niçek matur uqıylar.

Gölzadä Kamalova, Helsinki-Peterbur

XS
SM
MD
LG