Accessibility links

шимбә, 3 декабрь 2016, Казан вакыты 03:27

Açıq mikrofon: Qazanğa tağın nindi qorılmalar kiräk?


Qazan şähäre başqarma komitetınıñ düşämbe cıyılışında şähärne üsterüneñ general’ planı qaraldı. Äytergä kiräk, soñğı yıllarda şähärdä zur tözeleşlär bik küp alıp barılsa da, Qazannıñ nindi yünäleştä üzgärüe, kiläçäktä nindi buluım küzalläw mömkin tügel ide. Çönki şähärdä äle haman da anı üsterüneñ general’ planı yuq. Cıyılışta plannı yasawçılar, bügenge köndä anıñ 90 protsentqa äzer buluın äyttelär. Älege planda berençe çiratta närsägä iğtibar itelä soñ? Şuşı eş belän şöğellänüçelär süzlärenä qarağanda, general’ plannıñ maqsatları – qazanlılarnıñ tormışın caylaw, ekologik şartlarnı yaxşırtu, transport sistemasınıñ eşen köyläw, şähärdä yäşellekne arttıru qaralğan. Şulay uq toraq tözeleşeneñ tığızlığın arttıru turında da süz bara yaña 2050 yılğa qädär xisaplanğan planda. Busı inde az cirdä kübräk keşe yäşärlek toraq tözüne añlata. Qazan xäzerge köndä 48 meñ gektar cirne biläp tora. 2050 yılda anıñ mäydanı 2 märtäbägä artaçaq, ä şähärdä yäşäwçe xalıq sanı million yarımnan artıp kitäçäk ikän. Alarğa toraq buldıru öçen bez haman şähärneñ mäydanın arttırıp torsaq, bez alarnı cihazlap häm transport belän tä’min itep beterä almayaçaqbız, dide cıyılışta qazan başlığı İlsur Metşin. Ä qazanlılar üzläre şähärneñ kiläçägen niçek küz allıylar? Kiläçäk Qazanğa nindi qorılmalar citmi? Bügenge Açıq mikrofon säxifäsendä bez qazanlılardan şuşı sorawğa cawap soraştıq.

Kübräk inde inde Qazanda sport qorılmaları barlıqqa kilsen ide. Min sportnıñ alğa kiteşen telim.

Niçek kenä bulmasın şähär üz stilen saqlap qalırğa tieş. Üzäktä zur binalar tözemiçä, iskeçäräk qalsın ide. Şulay uq balalar tügäräkläre öçen dä maxsus binalar maxsus tözelergä tieşter minemçä. Şul binada sport uyınnarı öçen bülmä, törle sänğät bülmäläre dä bulsa bik yaxşı bulır ide.

Xäzer qaya barsañ da böten cirdä aqça tülärgä kiräk. Elekke yäşüsmerlär oyışmaları, klubları xäzer barsı da yuqqa çıqtı. Menä şularnı yañadan qaytarırğa kiräk.

Minemçä, şähärdä säwdä üzäkläre genä tözelergä tieş tügelder inde ul, ä cämäğätçelekkä kiräkle bulğan binalarnı da tözergä tieşter. Şular arasında mäsälän, uqu yortlarınıñ binaları. Qaysıber uqu yortlarnıñ binaları cimerek xäldä, şularnı yañartsalar yaxşı bulır ide.

Qazanda teatrnı tağın da kübräk yaratsınnar öçen teatrlarğa ayırım binalar tözelsen ide. Şulay uq tatar yäşläre häm balaları öçen dä buş waqıtın ütkärü öçen binalar tözelsä äybät bulır ide.

Min Yaña Savin rayonında yäşim, bu rayon Qazanda bik tekä rayonnarnıñ berse bulıp sanala. Anda bik küp säwdä üzäkläre urnaşqan, läkin anda millilek citmi. Ägär dä şunda berär milli kunakxanä, milli başlar satıluçı kibetlär bulsın ide.

Şähärne tözekländerü, yaña qorılmalar buldıru digändä, minemçä iñ berençe çiratta anıñ çistalığına iğtibar itärgä kiräk.

Gölnaz Şäyxetdin

XS
SM
MD
LG