Dönyada, şul isäptä Rusiädä dä şundıy yunäleş bar - tarixta bulğan möhim waqiğalarnı surätlärgä tırışu, alarnı kürsätü. Keşelär başqa ğasırlarda yäşägän törle millät keşeläreneñ kiemen tegä, alarğa xas könküreş kiräk yaraqlar, qoralarnı yasıy. Häm borınğı babaylar qiäfätendä törle festival'lärdä qatnaşa.
Şundıy festival'lärneñ berse uzğan atna axırında Tula ölkäsendä ütte - Kulikov suğışınıñ tarixi urını dip sanalğan cirdä - ul bügen şulay dip atala da Kulikov qırı. Älege zur festival'dä Rusiädän häm yaqın çit illärdän 2 meñgä yaqın keşe qatnaşqan. Festival'dä qatnaşuçılar arasında Qazannıñ milli-mädäni üzäge qarşında eşläwçe “Wityäz” klubı da bar. Qazannıñ “Wityäz” klubı yegetläre Altın Urda batırları bulıp çığış yasağannar. Altın Urda batırları kiemennän tış qazanlılar festival'gä Qazan muzeenda saqlanğan çatır, bayraqnı, milli könküreş kiräk yaraqlarnı da alıp barğannar. Häm şuşı “Kulikov qırı” dip atalğan cirdä alar monnan cide ğasır elek bulğan dip isäplängän suğışnı kürsätkännär. “Wityäz” klubı citäkçese Vladislav Xabarov äytüençä, qazanlılar Kulikov suğışı barışın bik canlı itep kürsätä belgännär. Festival'dä uzğan çaralarnıñ berse uqtan atu bäygesendä Qazan yegete Konstantin Trofimov berençe urınnı alğan. Tatar xärbie kiemendä Konstantin tönlä uqtan atıp berençelekne yaulağan. Konstantin Trofimov söyli:
Bäygedä sport uqları tügel, ä näq urta ğasırnıqına yaqın bulğannarın qullandıq. Şuşı çarada min berençe urınnı aldım da inde. Bez tönlä belän uqtan attıq. Döresen äytkändä, älege bäygedä küp närsä unıştan tordı. Menä miña bäxet yılmaydı. Älbättä, urta ğasır uğınnan atırğa öyränü bik ciñe tügel. Monıñ öçen waqıt kiräk. Çönki anda bilgelängän urın yuq häm instinktiv räweştä genä atarğa turı kilä.Ğomumän, qazanlılar bu festival'dä aldınğı urınnarda buldı. “Wityäz” Qazan klubı anda iñ yaxşısı dip tanıldı.
Tağın şunı äytergä kiräk, soñğı yıllarda älege xärbi-tarixi festival'dä Altın Urda tarixına iğtibar arttı. Tulada uzğan festival'dä dä qazanlılardan tış Mäskäw, Xar'yakov, Minsk häm başqa şähärlärdän kilgän 40qa yaqın keşe altın urda batırları räweşendä qatnaşqan.
Al'bina Zäynulla
