Accessibility links

дүшәмбе, 5 декабрь 2016, Казан вакыты 01:27

Washington Post häm Guardian Rim Papası Benedict XVI çığışına möselman dönyasınıñ reaksiäse turında


Rim Papası Benedikt XVI-nıñ uzğan atnada İslam dönyağa qılıç belän taratılğan din dip urta ğasır Vizantia patşası süzlären iskä töşerüe, dönya möselmannarınıñ moña açulı reaksiäse, Papanıñ yäkşämbe könne üzen bu fikerdän çitläşterergä tırışıp añlatma birüe bu könnärdä Könbatış matbuğatında kiñ urın ala.

Sişämbe könne Washington Post basmasındağı Ğafu ütenülär citte inde digän mäqäläsendä Anne Applebaum Könbatış säyäsätçeläre, yazuçıları, fälsäfäçeläre häm süzçeläre ğafu ütenülärdän tuqtalırğa häm berläşä başlarğa tieş dip yaza.

Min bez barıbız da bu süzlärne yaqlarğa yäki tikşerergä tieşbez dimim, monı min Vizantiä teologiäsen öyränüçe belgeçlärgä qaldıram. Ämma bez barıbız da süz häm matbuğat iregen yaqlaw öçen berläşä alabız. Papağa şiksez urta ğasır tekstların telgä alu röxsät itelä. Bez şulay uq çirkäwlärgä, ilçeleklärgä, ölkän yäştäge ruxaniälärgä qarşı köç qullanularnı, säbäpsez höcümnärne ğäyepläw öçen açıq itep berläşä alabız dip yaza Applebaum.Washington Postnıñ şul uq sanında basılğan Bezgä çın dialog kiräk digän mäqälädä isä Rim papasına qarata tänqitçänräk fiker citkerelä.

Papa zur xata yasadı, üzenä dä, çirkäwenä dä, könbatışqa da qıyınlıqlar çığardı. Ul dönyanıñ iñ zur dinnäreneñ bersen citäkläwçe bularaq tügel, ä akademik teolog bularaq çığış yasadı. Papa bulu professor Joseph Ratzinger buludan bik nıq ayırıla dielä bu mäqälädä. Monda Papanıñ Rim cirkäwe citäkçelegenä kilep Benedict XVI isemen alğançı Joseph Ratzinger iseme belän mäğlüm buluın iskä alu kiräkter.

Mäqälädä Benedict XVI elekke märxüm Papa John Paul II belän çağıştırıla. John Paul Benedictnıñ teologik dälile belän kiñräk itep alğanda bälki kileşkän dä bulır ide. Ämma John Paul üzen zur säyäsi cawaplılıqlarğa iä bulğan dönyaküläm çirkäw başlığı bularaq tottı dip yazıla Washington Post mäqäläsendä.

Bu tema Britaniädä çığa torğan Guardian basmasında d urın alğan. Mäqälä Ayatulla Ali Xamenei Papanı dönyanıñ in zur çirkäwen Preziden Bushnıñ İslamğa qarşı täre höcümenä quşuda ğäyepläde dip başlana. Vatikan Rim Katolik çirkäwen küpsanlı möselmannar tarafınnan doşman dip bäyälängän könbatıştan ayıru maqsatında 25 yıldan artıq diplomatiä alıp bardı. İrannıñ ruxi citäkçese äytkännär bu diplomatiädä artqa çigeneşne çağıldıra. Papa Benedictnıñ uzğan atnada İslam turındağı süzlärenä berençe märtäbä bäyä birep Ayatulla alar Amerikan Bushı tarafınnan İslamğa qarşı başlanğan täre höcüme çılbırın totaştıruçı soñğı buyın buldı dip äytte dielä mäqälädä.

Şul uq mäqälädä La Republika basmasınıñ Vatikan belgeçe Marco Politi fikere dä telgä alına. Politi bu çığışnıñ näticäläre turındağı yazmasında İslam dönyasına qarata säyäsätne yaña baştan qora başlarğa turı kiläçäk di.
XS
SM
MD
LG