Ölkä başlığı Sergey Morozov Çex ilenä säyäxät qıldı. Anı Kön'yak Morawiä gäyetmanı Stanislav Yuranek çaqırğan bulğan. Delegatsiädä – Ölkä Xökümäteneñ berniçä ministrı, biş iqtisatçı häm maltabar. Alar arasında millättäşebez Gabbas Salaxov ta bar. Vizitnıñ maqsatı – Kön'yak Morawiä belän iqtisadi xezmättäşlek elemtälären cayğa salu, Brno qalasındağı kürgäzmädä ölkäneñ iqtisadi mömkinlekläre belän tanıştıru. Şulay uq çex kompaniäläre belän berdäm proyektlarnı tormışqa aşıru turında da söyläşülär bulğan.
Üzebezgä qaytsaq – xällär üzebezçä. Anatoliy Çubays faydasına eşläwçe Kuybıyşev elektorstansiäseneñ susaqlağıçı dambası nıq iskergän ide. Sember qalasınıñ Tübän terrasa digän öleşeneñ su astında qaluı ixtimal. Dambanı tözätü-yañartu öçen Mäskäwdän kilgän 14 million rubl' totılıp betkän, ä yarlar nığıtılmağan. Prokuratura “Byudjet aqçasın ayıruça zur külämdä döres qullanmaw” turında cinayät eşe açqan. Ğäyeple keşeneñ 5 yılğa qädär iregennän mäxrüm itelüe mömkin, di.
Şul uq waqıtta Anatoliy Çubays aldağı qış könnärendä 18 töbäkne elektr belän tä'min itüdä çikläw belän yanadı. Bu 18 arasında – Sember ölkäse dä. Şuşı cähättän “Simbirskiy kur'yer” gäzite tulı ber säxifäsen “Qarañğılıqta tuñdıru belän yanıylar” digän yazmağa birgän. Mäğnäse – “mı-to tut priçem?” dip aptırawda.
Çınlap ta, Kuybıyşev elektr stansası arqasında Sember ölkäse xalqı bixisap tarixi awılların, Parijda - Luvr muzeenda uñdırışlılıq ürnäge bulıp saqlanuçı millionlağan gektar İdelbuyı ciren yuğalttı, balıqsız qaldı. Ä buşlay uq diärlek tabıla torğan elektr energiäseneñ bäyäse yıllap tügel – aylap tuqtawsız üsä bara. Şul uq waqıtta, şul uq Çubays qaramağına küçerelgän Semberdäge qüätle, zamança qorılğan 3 TES eşlämi dä diärlek. Çönki alarğa yağulıq taläp itelä. “Simbirskiy kur'yer” äytüençä, alarnı eşlätmäw – şul uq monopolist Çubaysnıñ yağulıqqa aqça sarıf itärgä telämäwennän. Ägär alar tulı qüätlärenä eşläsälär, “energiä citmi” digän safsatağa urın qalmas, anıñ bäyäse tuqtawsız üsä almas häm Çubaysnıñ monopoliäse qaqşar ide.
RAO YEES şayarışları küplärne aptıratsa da, qayberäwlär öçen başqa närsälär möhimräk ikän. Anatoliy Vostryakov digän keşe östennän düşämbe könne sud eşe açıldı. Anı millätara ızğış tudıruda ğayıplilär. Ul çığara torğan şäxsi gäzittä yähüdlärgä häm alar dinen totuçılarğa qarata näfrät tudıra torğan süzlär bar ikän. Läkin Vostryakov bu cinayät eşen dä, ğomumän, Rusiä Federatsiäseneñ qanunnarın da tanımıy, çönki ul üzen bu ilneñ grajdanı dip sanamıy. Rusiä pasportınnan baş tartqan, SSSR pasportı belän genä yäşi. Anı eşkä dä almıylar, eşsezlär isemlegenä dä kertmilär. Şunlıqtan ul ayırım Urıs däwläte tözegän häm üzen şul ör yaña däwlätneñ prezidentı dip iğlan itkän.
Ölkä üzägeneñ Lenin rayonı mäxkämäse bu kolliziäne niçek xäl itär tağın...
Härkem üzenä üzençä eş taba inde. Şuşı arada Semberdä İdelbuyı Federal' okrugı töbäkläreneñ yäş sportçıları qatnaşlığında Keçe olimpiada uzdı. Sportnıñ 10 töre buyınça yarışlar Sember häm Mäläkäs şähärlärendä oyıştırıldı. Tatarstan sportçıları ğomum öçençe urın ayuladılar. Berençedä – semberleleär, xucalar. “Ömet” gäzite Samar qalası wäkile Oleg Säetovnıñ boks buyınça yäş sportçılar öçen master-klass oyıştırğanı turındağı xäbärendä bu yegetne millättäşebez, dip atağan ide dä - anısı mari balası bulıp çıqtı. Härxäldä, Säetov familiäle yegetneñ mari ikänen Samar gäzite “Berdämlek”neñ redaktorı Räfqat äfände Ähliullin raslıy.
Ä “Ömet”neñ soñğı sanındağı ber yazmanıñ iseme ayıruça iğtibarnı cälep itärlek: “Tıñlağız, “Azatlıq” radiosı söyli!” – dip atala ul. Anda Tatar-başqort redaksiäsen ozaq yıllar citäklägän Färit İdelleneñ yalğa kitüe, anıñ wazifaları moña qadär Färit äfändeneñ urınbasarı bulıp eşlägän Rim Gıyl'fanovqa yöklänelüe turında xäbär itelä. Şulay uq Rim äfändeneñ radiotıñlauçılarğa Kärim Qamal bularaq tanış buluı da iskä alına. Yazmada ber säğätlek tapşıruğa kertelgän yañalıq ta birelgän: 20шәр minutlıq öç bloknıñ eçtälege, mondıy büleneşneñ uñay yaqları tasvirlangan. Ä axırda “Azatlıq”nı tıñlaw dulqınnarı häm waqıtı turında mäğlümat tä bar.
“Ömet”tän tağın ber qısqa xäbär iğtibarğa layıqtır. Ölkä üzägeneñ İdelaryäğı rayonında eşli başlağan tatar milli komponentlı 91-mäktäpneñ räsmi açılışı oktäberneñ 4ендә bulaçaq. Anda ölkä başlığı Sergey Morozov, Tatarstannıñ Mäğärif häm fän ministrı Räis Şäyxelislamov, Bötendönya Tatar kongressınıñ Başqarma komitetı räise Rinat Zakirov, mäktäp binasın remontlawğa öleş kertkän maltabarlar häm tatar cämäğätçelege wäkilläre çaqırulı.
Şuşı mäktäpkä qağılışlı tağın ber kürkäm xäbär. Ul'yan däwlät universitetı rektorı Yuri Polyanskov cirle tatar avtonomiäse citäkçelegen qabul itkän. Äñgämäneñ näticäse quandıra da ala: ölkäneñ iñ däräcäle universitetı şul yaña ğına täpiläp kitkän mäktäpne şeflıqqa alırğa niät beldergän.
Ayrat İbrahim, Sember
