Accessibility links

сишәмбе, 6 декабрь 2016, Казан вакыты 13:14

Papa Benedict möselmannarda rizasızlıq uyatqan süzläre äytüenä ükenüen qabatladı


Katolik çirkäwe başlığı papa Benedict, urta ğasırlardağı ber Bizantin padişahınıñ islam turında äytkän süzlären telgä aluı belän möselmannar arasında rizasızlıq tudıruına yänä ükeneç belderde. Vaticandağı İzge Pitr mäydanında cıyılğan xristian xaciları aldında çığış yasap Papa hiç kenä dä İslamnı tänqitlärgä telämäwen, kiresençä, ike din arasında kiñ aralaşu yulların ezlärgä tırışuın äytte.

Katolik çirkäwe başlığı çärşämbe könne Vatikannıñ İzge Pitr mäydanında üzeneñ ğädäti qabul çarasın ütkärde häm şul mömkinlektän faydalanıp İslamğa tirän ixtiram belän qarawın belderde. Papa Benedict ber atna elek Germaniäneñ Regensburg şähärendäge çığışı belän bar möselman dönyasında rizasızlıq uyatuına ükeneçen äytte. Mäğlüm bulğança, şul çığışında Rim papası 14-nçe ğasırdağı bizantin padişahınıñ "Möxämmät päyğämbär keşelek dönyasına barı tik yaman wä yawız närsälär genä kiterde" digän süzlären äytkän ide.

Çärşämbedä Benedict, anıñ bu süzlärne qullanuı möselman dönyasında döres añlanmadı, digän fikeren qabatladı:

"Qızğanıç ki, bu süzlärne yalğış añlaw da mömkin ide. Ämma minem tekstnı iğtibar belän uqığan oçraqta şul açıqlana - urta ğasır padişahınıñ tiskäre mäğnädäge süzlären min hiç kenä dä üzemneke itep kürsätergä telämädem. Şaqtıy qarşılıqlı bu süzlär minem şäxsi qaraşlarımnı çağıldırmıy", dip belderde çärşämbe könne Rim papası Benedict 16-nçı.

Dönyadağı yaqınça ber milliard katoliknıñ başlığı, 79 yäşlek Papa, Regensburgta yasalğan çığış kiresençä, dinnär arasında dialog başlawğa etärü maqsatın quyğan ide, di:

"Minem teläk bötenläy başqa ide. Süzne bizantin padişahı äytkännärdän başlaw min näticädä uñay mäğnädä häm matur süz belän din taratuğa salqın ğaqılnıñ yardäm itärgä tieşlegen kürsätmäkçe idem. Min dinneñ köç qullanu belän bergä bara almawın citkerergä tırıştım", dip añlata xäzer üzeneñ Regensburg çığışında bizantin padişahınıñ Möxämmätne xurlağan süzlären kiterüne Papa Benedict.

Katoliklar başlığı, soñğı könnärdä kütärelgän şawşu alay da uñay wä tänqitçän dialog başlawğa yardäm itär, digän ömet belderä. Andıy aralaşu törle dinnär arasında ğına tügel, xristiannarnıñ üzläre arasında da kiräk, di Papa.

Yäkşämbedä Benedict, üz çığışına şundıy kötelmägän möğämälä kürsätelä başlawına nıq ükenüen, qarşılıqlı süzlärneñ anıñ üz qaraşların çağıldırmawın inde ber äytkän ide. Qayber möselman ruxaniläre Papadan yaña täwbälär taläp itte, ul arada Vaticannıñ matbuğat üzäge dä, anıñ däwlät sekretare dä ükeneç belderüläre yasadı.
XS
SM
MD
LG