Accessibility links

җомга, 9 декабрь 2016, Казан вакыты 03:07

Peterbur tatar cämğiätläre yaña sezon aça


Cäy buyı daçada yatqan xalıq äkrenläp şähärgä qayta başladı, häm otpusk, kanikullar waqıtında sülpänlänep torğan ictimaği- mädäni tormış ta canlanıp kitte. İctimaği oyışmalar yaña sezonnıñ mädäni çaraları planın tözilär, ütkän yılğı eşlärgä yomğaq yasıylar. Dekaber ayında uzğan Tatar milli-mädäni möxtäriät räise saylawlarınnan soñ barlıqqa kilgän "Peterburg tatar milli cämğiäte" dä eşlängän eşlären barlıy, yaña çaralar uzdıra, yaña eşlär planlaştıra.

Oyışmanıñ räise Räşit Tahir ulı Mähdiev- Peterburgnıñ tanılğan eşquarı. Şähärdä iñ populyar restorannarnıñ berse- "Sabantuy "nıñ xucası. "Berdäm Rusiä"firkäseneñ töbäk sovetı, şähär İctimaği sovetı prezidiumı äğzası.Tatar milli xäräkätendä berençe genä yıl tügel. Şähärdä uza torğan törle xäyriä çaralarınıñ, konsertlarnıñ daimi iğänäçese.

Bügen Räşit Mähdiev "Azatlıq"tıñlawçıların "Peterburg tatar milli cämğiäteneñ"yaqın kiläçäkkä plannarı belän tanıştırır, millät turındağı uy-fikerlären işetterer.(Audioda:sovet xökümäte üz waqıtında xalıqnı tarqatu östendä uñışlı eşläde:xalıq üzeneñ traditsiälären, telen yuğalttı, ayıruça Peterburg kebek meğapolislarda. Bezneñ oyışmanıñ maqsatı- şuşı yuğalğan ğöref-ğadätlärne, mädäniätne, telne qaytaru.

Ütkän yıl küp eşlär eşlände. Bıyıl da plannar zur. Äle xalıqtan täqdimnär cıyabız, plannar tözibez.

23 sentäberdä Belosel'skiy- Belozerskiylar sarayınıñ 400-450 keşelek zalında Salix Säydäşevqa bağışlanğan zur konsert bulaçaq. Xalqıbıznıñ dahi cırçısı İlham Şakirov qatnaşlığında. Ütkän yıl da bez böyek cırçıbıznı Grand otel' "Yevropada" xörmätlägän idek. .Döresräge ul, üzeneñ yubileyın bezdä ütkärergä rizalaşıp, Peterburgqa xörmät kürsätte. İlham Şakirov aña qädär 20 yıllap şähärebezgä kilä almasa da, küpme piterlı anıñ cırların tıñlap üste. Şunı iskä alıp, bezneñ cämğiät üteneçe buyınça İlham Şakirovqa prezident Putin qul quyğan ämer nigezendä Peterburgnıñ 300 yıllığına bağışlanğan medal' birelde.

Möselman traditsiälären saqlaw östendä dä eş alıp barabız. Uraza, Qorban bäyrämnärendä 500 keşe öçen tabın qorabız .Alarnıñ kübese- qarawçısız qalğan qartlar, ozaqlap söyläşep, aralaşıp utıralar. Ä inde öydän çığa almağan awıru, invalidlarğa bäyräm küçtänäçlären, büläklärne iltep biräbez.

Barlıq çaralarnı bez barı tik cämğiät äğzaları xisabına ütkäräbez: kemder 100 sum birä, kemder meñ. Äle balalarıbız tel öyränsennär, biergä yörsennär öçen arendağa zal aldıq, kitaplar çığarıp torabız.

.Bezneñ cämğiät sovetına şähärneñ abruylı keşeläre kerä: Şamil äfände Akbulatov, Räşit äfände İsmägıylov häm başqalar. Alar Peterburgnıñ 300, Qazannıñ 1000 yıllığın ütkärügä zur öleş kerttelär .Ber Qazan metrosı, Peterburg uramı ğına ni tora! Strel'nadağı Konstantin sarayı öçen tatar rässamnarınıñ äsärlären büläk ittek. İke şähärneñ üseşendäge rol'läre öçen küplärebez Däwlät büläklärenä layıq buldılar.

"Min ğomerem buyı tatarlarnı yala yağudan yaqladım" digän ğalim Lev Gumilev muzeyına yärdäm itep torabız, anda kiçälär dä uzdıraçaqbız.

Yaz köne Yusupovlar sarayında Röstäm Yaxinnıñ yubiley kiçäsen ütkärgän idek. Xalıq öçen buşqa. Klassik muzıka bit ul bik kiräk xalıqqa. Yusupovlar sarayı xezmätkärläre belän bez bik yaxşı mönäsäbättä. Bıyıl da klassik muzıqa kiçälären däwam itäçäkbez.

Ğomumän, mädäni çaralar ayğa ber tapqırdan da siräk bulmayaçaq.

Bezneñ cämğıät yaz köne bik zur yuğaltu kiçerde: bezneñ aradan Sayra xanım Vel'şakova kitte .Aña bıyıl 85 yäş tulğan bulır ide. Bez anı bik xörmät itä idek. Ul Peterburg tatarları öçen konsertlar, törle mädäni çaralar oyıştıra ide. İñ möhime: Sayra xanım bik qatlawlı yıllarda da tatarça söylärgä, cırlarğa qurıqmadı. 22 sentäberdä aña istälek taşı quyaçaqbız.

Plannar zur, eşlärgä genä kiräk. Aldan söyläw- maqtanu bulır ide. Bez bit inde xalıq öçen eşlibez, eşebezgä bäyäne dä xalıq birer.

- Şähärdä Milli-mädäni möxtäriät belän "Peterburg tatar milli cämğiäte arasındağı mönäsäbätlär turında törle süz yöri. Şul mäs’älägä dä açıqlıq kertik äle digän sorawğa Räşit äfände Mähdiev : "Şähärdä tatar milli problemaları belän ike ictimaği oyışma şöğellänä. Berse Milli-mädäni möxtäriät. Berük maqsatqa barabız, yullarıbız ğına törle.. Alar üz yulları belän bara, bezneñ üz yulıbız. Ämma xezmättäşlek mömkin, bez härçaq äzer bergä eşlärgä",- dip cawap birde.

Gölzadä Kamalova, Sankt- Peterburg

XS
SM
MD
LG