Başqortstannıñ danlı ulı, kürenekle säyäsätçe, cämäğät eşleklese häm jurnalist Şahit Xodaybirdinnıñ tuuına 110 yıl tuldı. Şuşı uñaydan Ufada häm respublikanıñ Kügärçen rayonında qayber Xäter çaraları başlandı. Şahit Xodaybirdin tumışı belän Kügärçen rayonınnan. Şuña da anıñ xörmätenä äzerlängän baytaq çaralar anda da ütä.
Ufada atnakiç könne Şahit Xodaybirdinnıñ tuuına 110 yıl tulu uñayınnan fänni-ğamäli konferensiä bulıp ütte. Anda respublikanıñ räsmi şäxesläre, deputatlar, tanılğan ğalimnär, yazuçılar, jurnalistlar qatnaştı. Şahit Xodaybirdin üz zamanı öçen bik uqımışlı häm buldıqlı keşe bulğan. Başqortstannıñ däwlätçelegen buldıru öçen küp köç salğan, başqort yazma telen äzerläwgä zur öleşen kertkän ul. Berara respublikanıñ xakimiät oyışmalarında da yuğarı wazifalar bili. Şahit Xodaybirdinnı respublika xalqı talantlı jurnalist, publitsist bularaq ta belä. Menä şul küpqırlı talant iäse häm cämäğät eşleklese sıyfatların Ufada ütkän konferensiädä çığış yasawçılar tiränräk açıp birergä tırıştı.
Cıyınnı Başqortstan Däwlät Cıyılışı-Qorıltay räise Konstantin Tolkaçev açtı häm Şahit Xodaybirdinnıñ respublika tarixında qaldırğan tirän eze xaqında söyläde. Annan soñ çığış yasağan Başqortstan Yazuçılar berlege räise Rawil Bikbaev, ğalimnär Räşit Şäkürov, Marat Kolşäripov häm başqalar Şahit Xodaybirdinnıñ kiñ qırlı eşçänlege xaqında küp kenä qızıqlı mäğlümatlar birde. Marat Kolşäripov fikerlären tıñlıyq.
Kolşäripov:Şahit Xodaybirdin küpqırlı eşçänlek alıp barğan. Citäkçe urınnarda da eşlägän. Başqort yazma telen buldıruğa da küp köç salğan. Hiçşiksez, talantlı häm zur şäxes ul.
Tanılğan säyäsätçe häm osta oyıştıruçı, citäkçe genä tügel, ä talantlı jurnalist häm publitsist ta bula Şahit Xodaybirdin. Bügenge köndä Başqortstan jurnalistlarınıñ iñ zur büläge dä Şahit Xodaybirdin isemen yörtä. Bu büläkkä bıyıl distädän artıq qäläm ähele däğwä itä. Ciñüçelärneñ isemnäre tizdän bäyän iteläçäk tä inde. Başqort ğalime Räşit Şäkürov süzlärençä, Şahit Xodaybirdinnıñ jurnalistikadağı eşçänlege küp kenä yäş jurnalistlarğa bügen dä mäktäp bulırlıq.
Şäkürov:Törle yuğarı wazifalar biläwdän tış, Şahit Xodaybirdin jurnalist häm publitsist ta bulğan. Bez anı şulay dip beläbez häm xörmät itäbez. Anıñ yazğan äyberläre bügen dä aktual'.
Şahit Xodaybirdinnıñ tuuına 110 yıl tuluğa bağışlanğan çaralar oktäber ayında da däwam itäçäk. Küp çaralar ul çaqta kürenekle şäxesneñ tuğan yağı – Kügärçen rayonına küçä.
