Accessibility links

Кайнар хәбәр

“Ğäliä” mädräsäse yübileyına äzerlänä


Ufadağı danlıqlı “Ğäliä” mädräsäseneñ 100 yıllıq yubileyın bäyräm itü qısalarında bıyıl Başqortstanda baytaq qına tantanalı çaralar ütäçäk. Äle alarnı oyıştıruğa äzerlek mäs’älälären tikşergän kiñäşmä bulıp ütte. Başqortstan vitse-premyerı, respublikanıñ mädäniät häm milli säyäsät ministrı İldus İlişev ütkärgän bu utırışta “Ğäliä” mädräsäseneñ 100 yıllıq yubileyın bilgeläw çaraları xaqında täfsille fiker alışu buldı.

Mäğlüm buluınça, “Ğäliä” mädräsäse 1906 yılda Ufada kürenekle tatar baylarınıñ aqçasına tözelä häm anda tatarlar belän başqortlar ğına tügel, ä başqa törki xalıqlar wäkilläre dä belem ala, soñınnan uqımışlı, ataqlı şäxeslärgä äwerelä. “Ğaliä” mädräsäsendä dini sabaqlar belän bergä dönyawi fännärdän dä tirän belem birelä.



“Ğäliä” mädräsäseneñ 100 yıllıq yubileyı uñayınnan Başqortstan Xökümäte räise imzalağan färmanğa yaraşlı bik küp mädäni häm dini çaralar oyıştıru küzallana.

Ufadağı Zäki Wälidi isemendäge Milli kitapxanädä “Ğäliä” mädräsäse tarixına qağılışlı dokumentlardan, kitaplardan häm törle äsbaplardan torğan kürgäzmä açılaçaq. Başqortstan Respublikasınıñ Milli muzeyında isä şulay uq “Ğäliä”neñ törle eşçänlek yılların çağıldırğan tege yäki bu dokumentlardan, qullanış äyberlärennän tuplanğan kürgäzmä oyıştıru qaralğan.



Utırışta yasağan çığışında Başqortstan mädäniät häm milli säyäsät ministrı elekke “Ğäliä” mädräsäseneñ yañadan din ähellärenä qaytarılıp birelüen häm anda Rusiä İslam universitetı urnaşuın uñay bäyäläde häm üzebezneñ din ähelläre töple belemne ğäräp illärendä tügel, ä üzebezdä alırğa tieş dip assızıqladı. “Ğäräp illärendä uqıp qaytqan yäşlär qaysıberdä bezneñ islamğa xas bulmağan ağımğa quşılıp kitä”, - dide ul.



Başqortstan vitse-premyerı, mädäniät häm milli säyäsät ministrı İldus İlişev fikerençä, respublikada xäzer din belgeçlären äzerläwçe uqu yortları citärlek. Häm alar arasında elekke “Ğäliä” mädräsäse traditsiälären däwam itüçe häm anıñ binasında urnaşqan Rusiä İslam universitetı da zur eş başqara ala.

Äye, “Ğäliä” mädräsäseneñ yubiley zurlap bilgelänäçäk. BR Xökümäte räise färmanı nigezendä respublika radio häm televidenie kanallarında “Ğäliä” mädräsäse tarixına bäyle baytaq qına tapşırular da äzerlänä xäzer.

“Ğäliä” mädräsäseneñ oluğ yubileyına Başqortstan tatar milli oyışmaları da äzerlänä. Tantanalarğa Tatarstannan da baytaq qunaqlar çaqırılaçaq.

Fänis Fätxi, Ufa

XS
SM
MD
LG