Accessibility links

пәнҗешәмбе, 8 декабрь 2016, Казан вакыты 15:05

İjawda «Spartak» tatar mädäniät yortı eşen däwam itä


Udmurtiädä mädäniät yortları bügen nindi genä xäldä qullanılmıy. Elek ul kinoteatr bulsa — anda kino kürsättelär, teatr ikän— konsert, spektakl'lärgä ağıldı xalıq. Teatrlar qarşında törle—törle tügäräklär eşläde. Alar da tüläwsez ide. Buğenge teatrlar üzlären saqlap qalu öçen nindi genä çaralar oyıştırmıy, nindi genä eşlär belän şöğellänmi. Şundıy mädäniät yortları arasında İjawdağı «Spartak» icat yortın da misal itep kiterergä mömkin. Bügen anda xalıqnı mädäni ağartu yünäleşendä nilär belän şöğellänmilär. «Azatlıq» radiosı xäbärçese «Spartak» xalıq icat yortı direktorı Rezidä Ältäf qızı Mirqasıymova belän oçraştı.

İjaw şähäreneñ «Spartak» kinoteatrın çın tatar mädäniät yortına äwerelderergä digän maqsat belän 90 yıllar başında anı Udmurtiä tatar üzäge üz qulına aldı. Aña «İdegäy» dip isem quştı. Anda tözekländerü eşläre başqarıp, tatar ansambl'lären tupladı, matur - matur çaralar da oyıştıra başladı. Ämma şähär administratsiäseneñ finans yärdämennän başqa binanı yäşätü mömkin bulmadı. «Spartak» icat yortı qabat munitsipal' mädäniät yortı statusın aldı. Şulay buluına da qaramastan, anı totuı ciñel eşlärdän tügel. Binanıñ tışqı küreneşe dä, zalları, bülmäläre de tözekländerü eşlären taläp itä. Anıñ şundıy xälenä qaramastan, icat yortınıñ direktorı Rezidä Mirqasıymova tarixqa qaytıp, tatar ictimaği üzäge bik yaxşı eş başqardı ul yıllarda, bügen bu binada yä restoran, başqa berär oyışma tuplanğan bulır ide, xäzer biredä tatar ansambl'läre bar, tügäräklärgä balalar yöri dip belderde.

Deresten dä, Spartak ijat yortında törle yäştäge millättäşlärebez öçen küp sanlı tügäräklärdä üzläreneñ mädäni ixtıäcların qänäğätländerü öçen mömkinleklär bar. Bügen «Spartak»ta eşläp kilüçe kollektivlarnıñ 70 protsentın tatar ansambl'läre täşkil itä. «Spartak» icat yortı Lenin rayonındağı mäktäplär, balalar baqçaları belän kileşü nigezendä eşli. Balalar ana telen öyränü, matematika, bayan, fortepiano häm başqa tügäräklärdä , sport seksiälärendä belemen kütärä, sälämätlegen nığıta alaçaq.

Yäşlärgä rok, pop muzıkası belen şöğellänü öçen mömkinleklär bar. Bayan, akkordeon, gitara uyın qorallarında da uynarğa teläwçelärne dä qabul itälär. Tik uyın qoralları inde küptänge, alarnı alıştıru da zaruri.

Tik byudjetta monı öçen aqça yuq

Cäy aylarında yanğınğa qarşı köräş oyışmaları qararı nigezendä binanı keşelärneñ sälämätlegenä zıyan kiterü mömkinlegen yuq itu öçen, remont eşläre başqarıldı, çıbıqlar alıştırılıp, yaña cihazlar alınğan. Xäzer çiratta biyü zalın da matur itep bizäp, biredä balalar, yäşlär belän eşne canlandırıp cibärergä niätläre. Kiläçäktä «Spartakta» Tatarstan, Başqortstannan tanılğan artistlarnıñ gastrol’'lären oyıştırırğa xıyallanalar. Bügen zur säxnä ostaları şähärebezneñ başqa zallarında çığış yasıy.

Süz uñayınnan, bıyılğı konsert sezonın Salawat çığışları başlıy. Berençe konsert «Aksion» mädäniät yortında 6-7 oktäberdä bulaçaq.

Ä bügen «Spartak» xalıq icat yortında balalar häm ölkännär öçen tügäräklär oyıştırıp, konsertlar quyıp, niçek tä yäşärgä omtıla. Mäydannarın başqa oyışmalarğa arendağa birep, aqça tuplıy. Näq şuşı keremnän alar bıyıl tözekländerü eşlären başqarğan. Ämma binanı matur itep tözekländerü, kollektivlarğa eşläw öçen tieşle şartlar tudıru buyınça bik küp tırışsalar da, üzläre genä xäl itä alırlıq tügel. Şuña da Rezidä Mirqasıymova äytüençä, alarnıñ böten ışanıçı Udmurtiäneñ Rossiägä quşıluına 450 yıl tuluğa bağışlanğan planğa bu binanı tözekländerüne dä kertergä. Şul çaqta ğına ul çın çınlap mädäniät yortı bulaçaq. Ä xäzergä ul taşlandıq binanı xäterlätä. Biregä ata—analar balaların çarasızlıqtan yörtä, ä tatar kollektivlarınıñ berdänber tuplanıp eşläw urını bulıp qala.

Xämidä Ğayfullina, Udmurtiä

XS
SM
MD
LG