Accessibility links

җомга, 9 декабрь 2016, Казан вакыты 14:44

Yaroslavldä mäçetkä höcüm yasalğan


Bıyıl şähärneñ meñ yıllığı belän mäçet tä üzeneñ yöz yıllığın bilgeläp ütärgä cıyına. Şundıy waqiğa aldınnan, Ramazan ayınıñ berençe könendä, yöz yıl buyı törle xäwefle zamannarnı isän imin uzdırğan mäçetkä höcüm itkännär. Anıñ täräzälärenä yandırğıç sıyıqçalı şeşälär atqannar. Mäçet işek aldında torğan ike maşinanı küsäklär belän bärep watqannar. Bäxetkä, ber keşegä dä zıyan kilmägän. Bu xälgä qarata fikeren sorap bez Yaroslawl mäçete imam xatıybı Röstäm xäzrät Batıyrov belän telefonnan elemtägä kerdek. Ul süzen höcümnärdän mäçetkä kilgän zıyan turında söyläwdän başlap bolay dide:

“Mäçetkä ällä ni zıyan kilmäde. Şartlatqıç sıyıqçalı şeşälärdän 3 täräzä watıldı. Läkin yanğın bulmadı. Berkem dä zıyan kürmäde. Tağın mäçet işek aldında torğan 2 maşinanı küsäklär belän bärgälär watqannar”.

Ä inde mäçetkä höcüm oyıştıruçılar turında mäçet idäräsendä fikerlär berniçä. Röstäm xäzrät alar turında bolay dip añlattı: “ Berençedän, bez monı gubernatornıñ doşmannarı yasağan dip uylıybız. Çönki ul ölkädä xalıqlar arasında duslıqnı saqlarğa teli. Şuşı könnärdä küper açılışına bezgä prezident kilergä tieş. İkençedän, bez Kondopoğa xällären dä beläbez. Bälki maxsus eşlängänder dip uylıybız. Annan soñ tağın ber fiker bar, Ramazannıñ berençe könendä yähüdilärneñ yaña yılı ide. Bezgä aldanraq, “Yähüdilär Rusiäddän kitegez!” digän yazmalar da taşlağannar ide. Bezne, möselmannarnı yähüdilär belän butağannardır dip tä uylıybız. Çönki bu eşlärne nadan keşelär yasağan. Miherbansız, yöräklärendä iman-äxlaq bulmağan axmaqlar eşe bu. Bez, alarğa täwfıyq teläp, mäçettä doğa qıldıq”- dide Röstäm xäzrät.

Bezneñ mäçetebez bik awır yıllarnı kiçep tä saqlanıp qalğan. Xattä anı cimerergä digän färmannı da alıp uqıdıq arxivtan. Suğış waqıtında töşkän bomba da şartlamıy qalğan mäçettä dide, Röstäm xäzrät.

Ölkä citäkçeläre ölkädä xalıqlar arasında duslıqnı saqlarğa tırışlar, dide Röstäm xäzrät. Bu waqiğadan soñ da gubernator häm eçke eşlär idäräse citäkçese mäçetkä kilep ğafu ütengännär. Mäçetne tözekländerü öçen çığımnarnı üz öslärenä alırğa häm bu şartlawlarnı oyıştıruçılarnı da tabarğa wäğdä itkännär.

Yaroslavl'' mäçetendäge şartlaw uñayınnan borçılu belderep, Rusiäneñ möftilär şurası da möräcäğät qabul itkän. Xoquq saqlawçı oyışmalar bu wäxşilekne başqaruçılarnı tabıp xökemgä tartırlar, digän ışanıçın da beldergän.

Näzifä Kärimova, Mäskäw

XS
SM
MD
LG