Accessibility links

пәнҗешәмбе, 8 декабрь 2016, Казан вакыты 05:09

“Millätlär krossı”nda 110 meñ tatarstanlı qatnaştı


Yögerü sälämätlek öçen bik faydalı bulğan sport töre. Bigräk tä yöräk-qan tamırları, sulış orğannarı awıruları belän integüçelär öçen. Yöräk awıruları bik küplärneñ ğömeren qısqarta, älege awırular belän integüçelär iñ küp ülä. Yögerü isä alarnıñ sälämätlege öçen şifalı çara. Şuña kürä qayber keşelär irtän torğaç, uramda yañğır yausa da, salqın cilde bulsa da, barı tik üzlärenä genä tanış bulğan suqmaqlarğa yögerä. Awırular ğına tügel, üz sawlığın qayğırtqan qayber sälämät keşelär dä bik räxätlänep yögerä.

Xalıqnıñ iğtibarın sälämät yäşäwgä yunälderergä teläp, Rusiädä “Millätlär krossı” digän yögereş bäygese ütä. Älege bäygedä böten il xalqı qatnaşa, yäşe dä, qartı da, sälämäte, xastası da bu könne yögerü yulına çığa. Bıyıl “Millätlär krossı”nda 800 meñgä yaqın keşe qatnaştı. Alarnıñ yartısınnan kübese - yäşlär. Fizik kul'tura häm sport federal' agentlığı citäkçese Vyaçeslav Fetisov äytüençä, yıl sayın krossta qatnaşuçılar sanı ike tapqırğa artıp kilä. Kiläse yılğa yögereştä qatnaşuçılarnı ber millionğa citkerergä cıyınalar ikän. Aldağı yılda “Millätlär krossı”nda elekke Sovetlar berlege respublikalarında yäşäwçelärneñ häm qıtaylarnıñ da qatnaşuı kötelä.

Bıyılğı yögereştä iñ aktiv qatnaşuçılar bulıp Mäskäw, Peterbur, Qazan, Yekaterinbur şähärläre isäplände. “Komsomol'skaya pravda” gäzite jurnalistı Aleksandr Kuçuk fikerençä, Çuwaşiä xalqı krossta üzen bik yaxşı kürsätkän. Mäskäwdä 8 meñ keşe qatnaşsa, keçkenä Çabaqsarda - 30 meñ keşe yögergän, di jurnalist. Ul sälämät rusiälelärne Çuwaşiä respublikasında ezlärgä kiräk dip sanıy. Älege respublikada xalıqnı däwalaw, belem birü şaqtıy yaxşı oyıştırılğan, keşelärneñ tormışın ciñeläytü öçen dä kiräkle çaralar qullanıla, di “Komsomolka” jurnalistı.

Qazanda isä “Millätlär krossı”nda 15 meñ, ä Tatarstan buyınça 110 meñ keşe qatnaştı. Tatarstan yögereştä qatnaşuçılar sanı buyınça Rusiä buyınça iñ aldınğı urında tora. Respublikanıñ barlıq şähärläre dä älege ilküläm sport çarasında bik aktiv qatnaştılar. Çallıda 40 meñ keşe, Älmättä - 17 meñ, Tübän Qamada 11 meñ, Çistay, Bögelmä şähärlärendä 3әр meñ keşe yögergän. Qazannıñ Üzäk stadionı yanındağı mäydanda uzğan yögereştä ğadi xalıq belän bergä citäkçelär dä qatnaştı. Sportiv kiemnärne kiep respublikanıñ 200dän artıq türäse dä yögerde. Alar arasında sälämätlek saqlaw ministrı K.Zıyätdinov, sotsial' yaqlaw ministrı K.Novikova, prezident Apparatı eçke säyäsät idäräse citäkçese Aleksey Terent'yev, yul xäräkäte iminlege däwlät inspeksiäse idäräse başlığı Rifqät Miñnexanov häm başqalar bar ide. Xökümät wäkilläre 2011 yılda cäyge universiadada Qazannıñ qatnaşuın yaqlap, 2011 metrlı distansiädä yögerde.

Al'bina Zäynulla

XS
SM
MD
LG