Accessibility links

җомга, 9 декабрь 2016, Казан вакыты 12:47

Peterburda tağın ber çit il keşese üterelgän


24 sentäberdä, kiç belän tağın ber hind studentına höcüm bulğan. Şähär urtasında, tağın şul Kirillovskaya uramında. Şul uq Meçnikov isemendäge Meditsina akademiäse tulay torağı yanında april ayında da ber hind studentına höcüm bulğan ide.Tik ul waqıtta tabiplar studentnıñ ğömeren saqlap qala alğan idelär. Bu yulı inde tabiplarnıñ tırışlığına da qaramastan 25 yäşlek Nateş Qumar Singxnıñ ğömere küp qan yuğaltudan özelde.

Kiç belän kibetkä ikmäk alırğa ğına çıqqan Qumar Singxqa bişme-cideme keşe höcüm itä. Kürüçelär äytüençä, yäşüsmerlärdä skinxedlar atributikası bulmıy. Başta yegetne bik qatı qıynıylar, annan berniçä tapqır pıçaq belän qadıylar. İptäşläre, berençe yärdäm kürsätep, Mariinskaya däwaxanäsenä ozatalar. Mariinskaya däwaxanäseneñ baş tabip urınbasarı Xäsän Musukaev äytüençä, yegetne arqa yaqlap yaralıylar, başlıça sul yaqtan, 3 cäräxät ütäli .Qan tamırlarına ğına tügel, yöräkkä dä zıyan kilgän.

Bügen Meçnikov medetsina akademiäsendä leksiälär bulmadı, traur iğlan itelgän ide. Köndez studentlar Akademiä yanında cıyıldılar. İndiäneñ general konsulı, akademiäneñ prorektorı häm xoquq saqlaw orğanı xezmätkärläre studentlar aldında cawap totqannar.

Älegä 105 maddä (2 bülek) - xuliganlıq buyınça cinayät eşe quzğatılğan. Ämma başqa versiälär dä inkyar itelmi, şul isäptän millätara küralmawçılıq ta. General'' prokuraturanıñ mäğlumät çaraları belän eşläw bülege xezmätkäre Viktor Potapov äytüençä, tizdän Genprokuratura Rusiä buyınça "Millätara mönäsäbätlär turındağı " qanunnıñ ütäleşen tikşerä başlayaçaq. İnspeksiäneñ maqsatı - şuşındıy faciğälärneñ çın säbäben açıqlaw.

Gölzadä Kamalova, Peterbur
XS
SM
MD
LG