Accessibility links

җомга, 9 декабрь 2016, Казан вакыты 14:45

Qazanda suqbaylarnı terkädelär


Uram çatlarında qulların suzıp, xäyer sorap utıruçı äbi-babaylarnı kürü ğädäti küreneşkä äylänep bara bügen. Şähärneñ üzäk uramnarında, kibet çatlarında yış oçratırğa bula alarnı. “İpilek kenä biregez, zinhar öçen” dip yazılğan käğäzlär totıp, invalid kolyaskalarında, qultıq tayaqları belän yörüçe ğäriplär dä oçrıy. “Ber-ike tien biregez inde, apa”, dip, uram buylap artınnan itäk çabuıña yabışıp baruçı yätim balalar da siräk küreneş tügel.

Qazannıñ Eçke eşlär idäräse küptän tügel şähärdä xalıq qurqınıçsızlığın buldıru, yullarda häläkätlärneñ sanın kimetü häm yäşüsmerlärneñ suqbayçılıq belän şöğellänüen kisätü buyınça çara uzdırdı. Eçke eşlär idäräseneñ baliğ bulmağan balalar bülege xezmätkäre İrina Gabdullacanova äytüençä, älege çara suqbaylıqnıñ säbäplären açıqlaw häm telänep yörüçe yätimnärgä, awıru häm ğäriplärgä yärdäm itü, ä mondıy eş belän şöğellänergä mäcbür itüçelärne cawapqa tartu öçen uzdırıla. Transport yullarında aqça soranıp yörüçelär yullarda törle häläkätlärgä dä säbäpçe bulırğa mömkin. İrina Gabdullacanova bolay dide.

Militsiä xezmätkärläre suqbaylar küpläp cıyıla torğan urınnarda tikşerü uzdırdı. Aqça sorawçılar şähär üzägendä, Sul bolaq uramı, SUM kibete yanında küpläp yörilär. Kolyaskadağı ğärip suqbaylar Yamaşev prospektında da yış oçrıy. Älege çara waqıtında 73 bomj, yäğni bilgele yäşäw urını bulmağan keşe terkälgän. Alar arasında Samara, Tübän Qama, Mäskäwdän kilüçelär dä bar. Qazanğa alar şulay itep aqça eşläw öçen kildek dip añlatalar.

Älege eş waqıtında soranıp yörüçe 226 keşe bilgelängän. Alar arasında terkäw taläplären bozğan çit il keşeläre dä, qarawçısız qalğan balalar da, qullarına sabıylarnı totıp çıqqan xatın-qızlar da bar. Terkälgän balalarnıñ 22 baliğ bulmağan balalarnı qarawçı üzäkkä, 12 sotsial'' yaqlaw, 3 sälämätlek saqlaw oyışmalarına bilgelängän. Älege çara waqıtında terkälgän här keşegä qarata çaralar kürelä: beräwlär administrativ cawaplılıqqa tartıla, awırular sırxawxänälärgä, yätimnär balalar yortlarına ozatıla. Moxtaclarğa yärdäm kürsätelä. Şulay uq 3 keşegä qarata cinayät eşe dä quzğatılğan. Şulay, suqbaylarnıñ da bula törlese. Alar da iğtibar taläp itä.

Güzäl Zıyätdinova.

XS
SM
MD
LG