Accessibility links

якшәмбе, 11 декабрь 2016, Казан вакыты 07:15

“İxlas” mäçetendä iftar mäclese ütte


Düşämbe könne Ufadağı “İxlas” mäçetendä mö’min-möselmannar, Ramazan ayına kergäç, täwge iftar mäclesenä cıyıldı. Yözlärçä keşe kilde bu bäyräm aşına. İr-atlar da, xatın-qızlar da, balalar da bar ide anda. İftar mäclesenä cıyıluçılarnı “İxlas” mäçeteneñ imam-xatibı Möxämmät xäzrät Ğällämov Ramazan ayına kerü belän qotladı häm şuşı iftar mäclesen ütkärügä üz öleşlären kertkän igelekle din qärdäşlärgä zur räxmätlären citkerde.

“Menä tağın da izge Ramazan ayı kilep citte. Min hämmägezgä dä şuşı ayda sawlıq-sälämätlek, igelekle ğämällär qılıp yäşäwegezne telim, - dide Möxämmät xäzrät. - Bügen bezneñ mäçet mötäwälliäte äğzaları berençe iftar mäclesen oyıştırırğa qarar itte. Allahı boyırsa, Ramazan ayıbız matur başlanıp, izge eşlär östendä ütär”.

“İxlas” mäçete imam-xatibı üz çığışınnan soñ süzne salawat äytü häm azan yañğıratu öçen mäçettäge imamnarğa birde. Şunnan soñ bergäläp namaz uqu turında iğlan itelde. Bu ğibädätne qılğannan soñ, Başqortstan möselmannarı diniä näzaratı räise, möfti Nurmöxämmät xäzrät Niğmätullin Ramazan ayı başlanu uñayınnan qısqa ğına wäğäzen işetterde. “Uraza ayı aşaw-eçüdän tıyılunı ğına añlatmıy, ä saflanu, möselmanğa xas bulmağan ğämällärdän saq bulu ayı da ul”, - di möfti xäzrät.

Başqortstan möselmannarı diniä näzaratı räise, möfti Nurmöxämmät Niğmätullin üz wäğäzennän soñ, barça qunaqlarnı tağın ber qat ixlas qotladı häm Ramazan ayı däwamında “İxlas” mäçetendä yänä dä berniçä tapqır iftar mäclesläre oyıştırılaçağı xaqında äytte. Nurmöxämmät xäzrät Niğmätullin äytüençä, Başqortstanda Ramazan ayı taläplären cirenä citkerep ütäwçe din qärdäşlärebez yıldan-yıl arta bara. Bıyıl da izge ayda Uraza totıp, igelekle ğämällär qılıp kön itüçe mö’min möselmannar sanı şaqtıy.

Annan soñ mäçetkä cıyılğan mö’min-möselmannar aş tabınnarı yanına utırdı häm mul itep äzerlängän bäyräm rizıqlarınnan awız itte. Mäcles barışında Berläşkän Ğäräp ämirleklärennän kilep Ufada möğallimlek itüçe Äbdelkärim xäzrät, Ufadağı “Ğufran” mäçete imam-xatibı Ğäli xäzrät häm başqalar tağın da bik matur wäğäzlär söyläde häm dönyalarğa iminlek, tormış-könküreşkä bäräkätlär teläde.









Fänis Fätxi, Ufa







XS
SM
MD
LG