Accessibility links

пәнҗешәмбе, 8 декабрь 2016, Казан вакыты 07:17

Färit Taişev: “Yäşlärdä tanılğan cırçı bulu teläge bik köçle”


Şuşı könnärdä "Bars-media" prodyuserlıq üzäge "Tatarça Yoldızlar fabrikası-3" öçen yäş talantlar barlıy başladı. Alar Qazannıñ Lenin isemendäge mädäniät sarayında yäş başqaruçılar öçen kasting oyıştırdı. Bıyıl Tatarça yoldızlar fabrikasına saylap alu bäygese öçençe tapqır uzdı. «Bars-Media»neñ prodyuserlıq üzäge oyıştırğan älege çaranıñ maqsatı – tatar yäşläre arasınnan iñ talantlılarnı saylap, alarğa professional' estrada säxnäsenä ayaq basarğa yärdäm itü. Bıyılğı Tatarça Yoldızlar fabrikasında üz köçen sınap qararğa dip Qazan, Çallı, Tübän Qamadan ğına tügel, ä respublikanıñ küp kenä rayonnarınnan, xätta kürşe Başqortstannan da barlığı 220 gä yaqın yeget häm qızlar cıyıldı. Saylap alu bäygese şartlarına yaraşlı, yäş cırçılar ike cır başqarırğa tieş ide. Berse fonogramma belän estrada, ä ikençese, akapella, yäğni muzıkal' bizäleşsez ber xalıq cırı. Yäş-cilkençäkneñ baytağı älege sınawğa citdi genä äzerlängän. İke yözdän artıq däğwäçedän berniçä bulaçaq yoldız saylap alu turında “Bars-media” şirkätläre törkemeneñ general' direktorı Färit Taişev söyli:

«Bıyıl kastingta qatnaşırğa teläwçelär sanı, başqa yıllar belän çağıştırğanda, küpkä artığraq buldı. Pretendentlar arasında xätta şaqtıy professional' kollektivlar da, maxsus kasting öçen cırlar yazdırıp kilüçelär dä citärlek ide. Bu, yäşlärdä tanılğan cırçı bulu telägeneñ bik köçle buluın kürsätte. Qatnaşuçılarnıñ kübese estrada cırların başqarsa da, qayberäwlär başqa muzıkal' yünäleşlärdä, äytik, tanseval' häm rok stilendäge cırların täqdim itte. 220 qatnaşuçı arasınnan yaqınça 50 sendä ömet bar, läkin saylap alu protsessı haman däwam itä. Bez alar arasınnan iñ yaxşı 10 cırçını ğına saylap alaçaqbız. Alar 20 nçe dekaberdä «Tatar cırı» festivaleneñ berençe könendä, «Yoldızlar fabrikası»nda estradabıznıñ iñ populyar artistları belän ber säxnädä çığış yasayaçaq. Ämma kastingtan ütä almağan başqa talantlı yäşlärneñ käyefe töşmäsen. Biredä yañğırağan böten cırlar bezneñ tawış bazasında saqlana häm yaña proyektlar öçen tawış ezlägändä bez ul bazadan faydalanabız.

Ä inde «Tatar cırı» festivalendä tamaşaçınıñ iñ zur mäxäbbäten ayulağan yäş cırçılar belän «Bars-Media» kompaniäse 5 yılğa general' kontrakt töziäçäk. Ber-ike yıl elek kastingta «ilänep» qalğan Salawat Miñnexanov, Landış Nigmätcanova, İrkä, İlnaz Safiullin, İldar Äxmätov, Rumiä Fätxetdinova, Şäkür kebek yäş cırçılar bügen bezneñ prodyuserlıq üzäge belän eşli häm äkrenläp tanılıp kilä».

Färit Taişev süzlärenä qarağanda, älege kasting yäş başqaruçılarğa zur säxnägä çığarğa, xalıq arasında tanılırğa şaqtıy ğına mömkinçelek birä. Äytik, bügen saylap alu bäygesendä qatnaşqan yäşlär, irtägä tatar estradası kügendä yoldız bulıp balqıyaçaq. Yoldız bulu bäxete, küplärneñ xıyalı bulsa da, äzlärgä genä täti şul. Tatar xalqı ğömer-ğomergä cır-moñğa bay xalıq bulıp dan totsa da, talantlarnı barlarğa häm üsterergä kiräk. «Bars-Media» şirkäte yaña yoldızlar qabızır öçen böten mömkinleklär tudırğan. Qalğanı talanttan häm zamança estradanıñ taläplären añlawdan ğına tora. Gölnaz Şäyxetdin

XS
SM
MD
LG