Accessibility links

шимбә, 10 декабрь 2016, Казан вакыты 10:02

Çit töbäklärdäge tatar tele uqıtuçıları Qazanda belem arttıra


Tatarstannıñ mäğärifne üsterü institutında Rusiäneñ törle töbäklärendä tatar tele uqıtuçılar öçen belemne arttıru kursları daimi oyıştırılıp kilä. Mömkinçelek tuğanda institutnıñ möğallimnäre üzläre dä töbäklärgä barıp, andağı millättäşlärebez öçen ana tellären uqıtunı kamilläşterü buyınça däreslär, seminarlar ütkärälär. Bu yulı Qazanğa nigezdä Orenbur ölkäse awıllarında tatar balaları belän eşläwçelär kilgän ikän. Oyıştıruçılar süzlärenä qarağanda, alar çaqırularnı Rusiäneñ başqa şähär, ölkälärenä dä cibärgän bulğannar. Läkin mäğärif idäräläre uqıtuçılarnıñ çığımnarın qaplarğa telämäw säbäple, küp kenä keşelär kilä almıy qalğan. Kurslar eşendä qatnaşuçılar turında älege eş belän turıdan-turı şöğellänüçe, Mäğärifne üsterü institutı tatar tele häm ädäbiäte kafedrasınıñ ölkän uqıtuçısı Älfinur Sabirova mäğlümätlär birde.

Bu yulı bezneñ kurslarğa 20 keşe kilde. Alarnıñ kübese Orenbur ölkäsennän, şulay uq Stavropol’ ölkäsennän, Maru El respublikasınnan dä wäkillär bar. Kurslarnıñ programmasında uqıtuçılarnıñ belemen kütärü buyınça leksiälär bar. Monnan tış praktik öleş tä qaralğan. Anıñ qısalarında kilgän uqıtuçılarnı bez mäktäplärgä alıp barıp, mondağı kollegaları belän oçraştırabız, täcribä urtaqlaşabız

Qazanğa belemnären kütärergä kilgän uqıtuçılar öçen uqıtu ğına qaralmağan. Mädäni programma, qızıqlı oçraşular, Qazan belän tanışu da bar programmada.

Qazanda uza torğan Respublikanıñ Mäğärifne üsterü institutı oyıştırğan tatar tele uqıtuçıları Tatarstanğa belemnären üsterergä yışraq kilergä kiräklege turında äytte. Läkin töbäklärdäge cirle mäğärif idäräläre kurslar öçen aqça tüläp, uqıtuçılarnıñ yul çığımnarın qaplarğa telämi ikän. Menä bu yulı da uqıtuçılarnıñ qazanda toruın Tatar kongressı üz östenä alğan, kurslarnı isä institut tüläwsez räweştä oyıştırğan. Äle şuşı oçraqta da küplär yulğa ğına da aqça taba almağan. Xäyer, çittäge uqıtuçılarnıñ bu äle berdän-ber probleması tügel. Alar xaqında söyläşergä bez kurslarda belemnären arttıruçı berniçä millättäşebezne Qazan studiäsenä çaqırdıq. Alar belän bulğan Tügäräk östäl söyläşüen sez bezneñ kiläse tapşırularıbızda işetersez.

Gölnaz İlgizär

XS
SM
MD
LG