Accessibility links

чәршәмбе, 7 декабрь 2016, Казан вакыты 13:31

Financial Times: Möselmannarnı räncetüdän qurqıp Berlin operası Mozart äsären säxnädän aldı


Berlin operası möselmannarnıñ xislären räncetüdän qurqıp Mozartning ber äsären säxnägä quymasqa qarar itte. Älege tamaşada Möxämmät Päyğämbärneñ başın säxnägä çığaru küreneşe bar ikän. Şuşı waqiğa tiräsendä xäzer cancal quba.

Bu çeterekle mäsälägä bügen Könbatışnıñ beniçä gäzite urın birgän. Financial Times basması yazuınça, politsiä anonim yanawlar alğannan soñ, Berlin operası citäkçelärenä bu tamaşanı säxnägä quymasqa kiñäş itkän. Operanıñ sänğät citäkçese Kirsten Harms ikelänep bulsa da tamaşanı säxnädän alırğa qarar itkän.

Tamaşanıñ axırında Krit patşası İdomeneo (Mozart äsäre şulay atala da) säxnägä 4 baş çığarırğa tieş: diñgez patşası Paseidon, Budda, Ğäysä häm Möxämmät päyğämbärlärneken. Bu küreneş möselmannarnıñ xislären räncetäçäk digän qurqular bar.

International Herlad Tribune basaması yazuınça, Mozart üze yazğan original äsärdä andıy küreneş yuq. Bu axırın tamaşanı säxnägä quyğan rejisser Hans Neuenfels üzennän östägän. Yänäse patşa bü ğämäle belän Allalar ülde, xäzer insannar üz yazımşların üzläre xäl itä digän fikerne belderä.

Operanıñ säxnädän alınuı tiräsendä Germaniädä şaw-şu quptı. Times basması yazuınça, kemeder bu adımnı xuplıy, kemder täniqt belderä. Germaniädä 3 millionnan artıq möselman yäşi. İslam Şurası räise Ali Qızılqaya, andıy äsärne kürsätü döres bulmas ide, din-ara mönäsäbätlärgä ul faydağa bulmayaçaq digän fiker ätkän.

Ä menä kansler Angela Merkelneñ Mädäniät kiñäşçese Bernd Neumann bu adım süz ireklegenä yanaw bulıp tora digän.

Eçke eşlär ministrı Wolfgang Schäuble, 225 yıl elek yazılğan äsärne säxnädän alu – qabul itelmäslek, kölkele xäl digän. Äytkändäy, Schäuble äfände çärşämbedä Berlinda İslam-Xristian mönäsäbätlärenä bağışlanğan konferensiä açtı. İxtimal säxnädän alınğan opera mäsälä, ixtimal şuşı cıyında da tikşereläçäk.

Ali Ğilmi
XS
SM
MD
LG