Accessibility links

җомга, 9 декабрь 2016, Казан вакыты 09:00

Bulaçaq qäläm iäläre urmanda


KDUnıñ tatar jurnalistikası studentları soñğı arada gel iğtibar üzägendä. Alarnı sügälär dä, qayçaq maqtap ta alalar. Ä yurfaklıylar üzlärençä gazeta-jurnallarda, radio-televideniädä, başqa ölkälärdä eşli birälär. Tatar jurnalistikasına ber yaqtan yäşlär ağıla ikençe yaqtan uqıp beterep kitä baralar. Bıyıl bu fakul'tetnıñ berençe kursında 20 student uqı. Çärşämbe kön alarnı Qazan çitendäge urmanda jurfak dekanı, studentları, uqıtuçıları üz saflarına aldılar. Bu berençe kurslarnı bağışlaw kiçäse dip ataldı. Qazan däwlät universitetınıñ jurnalistika häm sotsiologiä fakul'tetı dekanı Wasil Ğarifullin söyli: - Uzem universitetta 80 yıllarda uqıdım. Jurnalistika bülegeneñ şundıy traditsiäse bar. Urmanğa çığıp jurnalistlar könen uzdıru, törle yarışlar, KVNnar, gazetalar çığara idek. Bik qızıq bula ide. Şuña oxşağan traditsiä Allağa şöker bügen dä däwam itä. Studentlar üzläre bik teläp menä bu çaranı ütkärälär. Min uylıym kiläçäktä däjurfak bäyrämnäre betmäs dip. Başqa yıllardağı kebek bıyıl da jurfakta yegetlär bik az, bıyıl ber yeget, 19 qız. Alar bağışlawda bik çaya, ütken kürendelär. Cırlıylar, biilär, küp närsä eşli belälär. Tozlı-borıçlı su da alarnı qurqıtmadı. Bağışlawda dekan, uqıtuçılar, studentlar, elekke jurfak betergännär räxätlänep uyınnar uynadılar, yafraq yañğırı astında tamaq yalğap aldılar, yuğarı kurslar belän ğap qordılar. Bu çaranı çittän qarap toru qayber keşelärgä säyer bulırğa mömkin, dekan, uqıtuçılar studentlar belän bergä sikerep-biep uynıylar, cäzalar ütilär. Studentlar alar turında kölkele taqmaqlar çığara. Bötenese dä ber-berse belän dus, ber däräcädä bulıp saf tatar telendä söyläşälär, küñel açalar. Berençe kurs qızlarınıñ bağışlawdan alğan tä'sirläre belän tanışıp kitik: - Tağın ber qat inandıq, jurfak iñ şäp fakul'tet. Mondıy çaralarnı yış ütkärergä kiräk, bezgä bik oşıy. Älege çarada berniçä yıl elek tatar jurnalistikasın tämamlağan yegetlär dä qatnaştı. “Käyef niçek?” gazetasınıñ baş möxärrire Danil Säfärov belän aralaşabız: - Äye bu keçeräk bäyräm jurfakta yıl sayın uzdırılıp kilä. Yıl sayın bezne dä çaqıralar, räxmät alarğa. Bik tä küñelle, üzebezneñ berençe kursta uqığan çaqlarıbıznı iskä aldıq. Şunda uq “Tatar radiosı” di-djey Zölfät Zinnurov belän dä söyläşep aldıq: - Menä bu urmanğa cıyılu bik yaxşı çara dip sanıym. Yıldan-yıl berençe kurs studentları, alar bit inde kübese awıldan kilälär. Törle rayonnardan, ber-bersen belmilär. Ä monda räxätlänep tanışalar, üzlären irken totalar häm inde duslaşırğa da mömkinlek bik zur. Menä min mondıy çara bulmasa közge urmannı kürmägän dä bulır idem, Allağa şöker jurnalistika fakul'tetı, bağışlaw köne bar. Yäşäsen jurfak!!! KDUnıñ Tatar jurnalistikası bülege uqıtuçısı İlham Fättäxov bağışlaw kiçäsenä tänqit küze belän dä qarap aldı: - Bıltırğısı ayıruça uñay tä'sir qaldırğan ide. Çönki studentlarnıñ berdämlege, oyışqanlığı yuğarıraq däräcädä ide. Bıyıl menä Ramazan ayına turı kilde. Küpkenä jurfak studentları uraza tota. Dini yaqtan da bez üzebezneñ dini mirasnı xörmät itärgä tieş. Şuña kürä bu çaranı yä urazağa qädär, yä urazadan soñ ütkärü otışlıraq bulğandır. Ölkän jurnalistlar redaksiälärdä mäş kilep yatsalar, yaña buın älegä küñel aça. “Läkin bu ozaqqa tügel, küptän ütmäs yaña kilgän jurfak studentlarınıñ da yazmaların basıla, söylämnären işetä başlar!” – di tatar jurnalistikası ostazları. Röstäm İsxaqi

XS
SM
MD
LG