Accessibility links

шимбә, 10 декабрь 2016, Казан вакыты 06:00

28 sentäber - narkologlar köne


Qazan yegete Ruslan Zaripov keçkenädän yomşaq küñelle bulğan. Awırlıqlarnı kürmiçä, yeget äni-ätiseneñ qoçağında irkälänep üskän. Anıñ öçen olı tormış Mäskäwgä uqırğa kitkäç başlana. Neftyanik ätise ulı öçen aqçasın cällämi, daimi räweştä aña cibärep tora. Ruslan isä mul tormışnıñ qäderen añlamıy. İptäşläre belän tönge klublarda yörep, ul äf'yun belän “duslaşa”. Başqa küp kenä yäştäşläre kebek ul da narkotik matdäne ber genä tapqır tatıp qararğa teli, ämma şul waqıttan başlap äf'yunneñ qolına äylänä. Äni-ätisen ul yartı yıl däwamında aldap yöri. Ğädättä, narkomanğa äylängäç, keşeneñ şäxese üzgärä. Ul bik nıq yalğanlıy başlıy, xäyläkär bula. Anıñ öçen tormıştağı barlıq qimmätlär dä ähämiäten yuğalta. Anı ber genä maqsat yörtä - äf'yunnı tabu häm qullanu.

Bügen Ruslan Tatarstannıñ narkologiä dispanserında däwalana. Respublikada anıñ kebek 8 meñnän artıq keşe xisapta tora. Çınlıqta isä alar küpkä kübräk, älbättä. Ruslan üz teläge belän däwalana - bu inde anıñ sälämät tormışqa qaytuına ömetne arttıra. Ämma küp keşe äf'yunnan qotılırğa aşıqmıy. Alar soñğı çikkä qädär tüzä, küpläre çirattağı lomka yäğni organizmı äf'yunne taläp itkändä integep ülä.

28 sentäber könne narkolog-tabibları üz hönäri bäyrämnären bilgeläp üttelär. Zaman awıruı - narkomaniä belän köräşüçelär bu könne zur kiñäşmädä qatnaştı. Respublikanıñ barlıq şähär-rayonnarınnan kilgän tabiplar narkomaniä, anı däwalaw ısulları xaqında fiker alıştılar. Kiñäşmädä Tatarstan xalqınıñ 0,3%tı äf'yun qullana dip äytelde. Narkomaniä buyına respublikada wäzğıät şaqtıy stabil' saqlana. Yıl sayın äf'yun qullanuçılar sanı 5%qa arta.

Kiñäşmädä 70 tabip qatnaştı. Anda respublikanıñ barlıq şähär, rayonnarınnan kilgän narkologlar kilgän ide. Respublikanıñ töp narkologı Färit Fättäxov awıldan kilgän tabiplarğa narkomaniägä iğtibarnı arttıru kiräklegen äytte. Soñğı yıllarda awıl cirendä dä äf'yun qullanu bik ürçi başladı, dide baş tabip. Awıllarda araqı eçüçelär sanı isä soñğı berniçä yılda xätta 80%qa artqan.

Al'bina Zäynulla

XS
SM
MD
LG