Accessibility links

җомга, 9 декабрь 2016, Казан вакыты 06:51

Küzläwçelär cäncalı Mäskäw-Tiflis arasında kierenkelekne arttırdı


Gruziäneñ küzläw eşläre alıp baruda şiklänelgän 4 Rusiä xärbi küzläw ofitserın qulğa aluı Mäskäwneñ açulı reaksiäsenä säbäp buldı. Rusiä tışqı eşlär ministrı Sergey Lavrov monı Tiflisneñ Rusiägä qarşı säyäsäteneñ ber öleşe dip atadı häm BMO İminlek Şurasın bu mäsäläne çişügä öleş kertergä çaqırdı.

Tiflistä Rusiäneñ Gruziädäge köçlär idaräse binası Gruziä köçläre tarafınnan çolğanışqa alınğaç Rusiä tışqı eşlär ministrı Sergey Lavrov "Bu barı tik Gruziäneñ Rusiägä qarşı säyäsäten tağın ber märtäbä kürsätü bularaq qına bäyälänä ala. Bez üz watandaşlarıbıznıñ kiçekmästän Rusiägä tapşırıluın taläp ittek. Bez mömkin bulğan barlıq çaralar belän alarnı azat itü öçen tırışaçaqbız" dide.

Lavrov şulay uq Gruziäneñ NATO belän bik tığız elemtädä buluın tänqitläde häm bu nizağ BMO İminlek Şurasınıñ iğtibarına layıq dide.

Rusiä saqlanu ministrı Sergey İvanov Mäskäwdä xäbärçelär aldında çığış yasap Gruziäne Rusiäneñ äle dä Gruziädä qalğan 2 xärbi bazasın buşatu turındağı elekke kileşülärne bozuda ğäyepläde.

"Bolar barısı da bezneñ tınıçlıq saqlawçılarnı kitärgä mäcbür itü öçen eşlänä, tınıçlıq saqlawçılar turında häm Gruziädäge Rusiä xärbi bazaların çığaru turında elek ireşelgän barlıq kileşülärne bozıp alarnıñ andağı xoquqıy statusın härtörle yul belän beterü öçen eşlänä" dide İvanov.

Rusiä mäğlümät çaraları belderüençä, İvanov şulay uq Rusiäneñ tieşle çara küräçägen äytkän häm bu xällärne Stalin repressiäläre belän çağıştırğan.

Çärşämbe könne Gruziä eçke eşlär ministrı Vano Merabişvili Tiflis häm Batumi şähärlärendä Rusiä xärbi küzläweneñ 4 xezmätkäreneñ häm tağın unnan artıq keşeneñ qulğa alınuın belderde.

"Alarnı berençe çiratta Gruziäneñ saqlanu mäsäläläre, NATO belän mönäsäbärläre häm kiläçäk plannar, Gruziäneñ energiä iminlege, oppozitsion säyäsi partiälär häm xökümättän tış oyışmalar, saqlanu ministrlığınıñ ayırım bülekläre, xezmätkärlä, şulay uq qorallar, suğış kiräk yaraqları satıp alu eşçänlege, diñgez portları, timer yul elemtäläre, transport mömkinleläre häm nizağlı töbäklärdäge xärbi büleklär qızıqsındıra" dide Merabişvili.

Gruziä parlamentınıñ saqlanu häm iminlek komitetı räise Givi Targamadze Gruziädä alarnıñ zur cinayätlär qılğanlığına bik ışanıçlı dälillär bar, dönyanıñ härber ilendäge kebek küzläw belän şöğellänü Gruziädä dä cäzalana torğan ğämäl dip monıñ säyäsät belän bäyle buluın kire qaqtı.

"Gruziä bernindi säyäsät belän şöğellänmiçä konkret cinayätkä qarşı köräşä, Rusiä isä monı säyäsätkä äyländerergä tırışa" dide Tagamadze.

Rusiä Saqlanu ministrı İvanov bügen şulay uq Batumi yanında Gruziä politsiäse Rusiäneñ 6 xärbien qulğa alıp, qıynap soñraq irekkä çığarğan dide.

Pänceşämbe könne Tiflistäge Rusiä ilçelege Gruziä watandaşlarına vizalar birüne tuqtattı.

Naif Aqmal, Praga.
XS
SM
MD
LG