Accessibility links

пәнҗешәмбе, 8 декабрь 2016, Казан вакыты 09:09

Christian Science Monitor: Quşma Ştatlarda latin-amerikannar İslamğa tartıla


Christian Science Monitor gäzite atnakiç sanında Quşma Ştatlarda çığışı belän Latin Amerikasınnan bulğan keşelärneñ İslamğa tartıluı turında mäqälä basıtrğan.

Hicab wä qaradan kiengän Catherine Garcia Orlando keşesenä dä turistqa da oşamağan. Sez qaydan? digän sorawğa, Columbiadan digäç, keşelär aptırap qala, di ul. Çönki, kitap kibetendä eşläwçe bu xanım üze latin-amerikalı, üze möselman.

Üz ilemedä min cämğiätkä kerep kitä almadım, ä monda İslamğa küçkäç här närsägä yaraqlaştım di ul.

Catherine Garcia Quşma Ştatlarda arta barğan möselman latin-amerikannarnıñ berse. Chicagodağı Amerika Möselman Şurası citäkçese Ali Khan süzlärençä, 1999 yıldan birle alarnıñ sanı 30%-qa artıp 200 meñgä citkän. Törle käsep wäkilläre, studentlar, möhacirlär - İslamğa kemder nikäx aşa, kemder qızıqsınu belän kigän. Ämmä härberse üz mädäniäte belän İslam dine arasında nindider urtaqlıq taba, dip yaza Christian Science Monitor.

Rusiäneñ İzvestia gäzite atnakiç sanında, Yaponiä Kuril utrawların büleşergä täqdim itä digän mäqälä bastırğan. Yaponiäneñ äle genä eşkä kereşkän yaña xökümäte, moñarçı kürelmägän qıyulıq kürsätep sensatsion täqdim belän çıqtı - Rusiägä bäxäsle utrawlarnı büleşergä täqdim itä, dip yaza gäzit. Xökümätneñ berençe utırışınnan soñ ütkän matbuğat oçraşuında Tışqı eşlär ministrı Taro Aso Mäskäwne üz-ara çigenülär yasarğa çaqırğan, bäxäsle utrawlar tiräsendäge wazğiät säyäsi çişeleş däräcäsenä çığa digän. Ministr süzlärençä, qararnı ministrlar tügel ä yuğarı citäkçelek qabul itergä tieş, şul çaqta ğına uñış bula ala. Ministr süzlären añlayışlı telgä tärcemä itsäñ, süz kompromis, iske bäxäskä yomşağraq qararğa çaqıru turında bara, dip yaza İzvestia gäzite.

İrlandiädä çığa torğan İrish Times basması Rusiädä dönya kürgän Korrupsiägä qarşı qullanma belän tanıştıra. 16 bitlek bu kitapçıqta, räsmilär rişwät taläp itsä, nişlärgä turında kiñäşlär birelä. Qullanmanıñ avtorı, Cämäğät pulatı äğzası Andrey Prjesdomski süzlärençä, soñğı 10 yılda Rusiädä rişwät alu sanı 10 tapqır artqan. Rişwätkä tap bulğan här keşeneñ burıçı - bu turıda militsiä, yä iminlek xezmätlärenä xäbär itü di ul. Kitapta monı niçek eşlärgä kiräge turında añlatma da birelä, dip yaza İrlandädä çığa torğan İrish Times gäzite.

Ali Ğilmi
XS
SM
MD
LG