Accessibility links

дүшәмбе, 5 декабрь 2016, Казан вакыты 07:36

Möselmanğa kiäwgä çığu pravoslaw dindäge xatın-qıznı çikli?


Bezneñ saqlanıp qaluıbıznıñ yulı ul pravoslau ğailäse, dip belderde yepiskop Mäskäwneñ Metropol'” otelendä uzğan yäşlär belän oçraşuında. Bu oçraşuğa pravoslau dindäge oyışmalarda toruçı 500dän artıq yäş keşe kilgän. Yepiskop alarğa keşelärneñ yış qına dingä iğtibar birmiçä ğailä qoruı häm näticädä bik citdi problemalar kilep çığuı xaqında söylägän.

Çirkäw wäkile fikerençä, ğailäneñ bäxetle buluı öç töp şart ütälüdän ğibärät. Berençedän, ir keşe ğailädä baş bulırğa tieş. İkençe aspekt - tormış yuldaşıñ öçen üzeñne qorban itä alu yäğni üzeñne anıñ mänfägat'lärenä buysındıra alu. Häm soñğısı - qaraşlar berdämlege. Bu mäs’älägä yepiskop zur ähämiät birde. Äxlaqi häm etik qaraşlarnıñ törle buluı - bik küp problemalarğa kiterä dide ul. Häm bu mäs'älädä bigräk tä möselman keşese belän ğailä qorğan pravoslau xatın-qızınıñ xäle qatlawlı buluın assızıqladı. “Ğailägä üzeneñ qaraşları bulğan pravoslau dinle qızlar Könbatışqa kitep, matriarxat yäğni irlär östenlekle bulğan däwlätkä, urta ğasır mönäsäbätläre saqlanğan cirgä elägä. Bälki din turında bik uylamağan, ämma pravoslau ğailäsendä tärbiälängän mondıy qızlarnıñ xoquqları hiçşiksez çiklänelä, di yepiskop. Häm misal da kiterä - küptän tügel miña Morokkoda bulırğa turı kilde, di çirkäw wäkile, anda ilneñ watandaşı pasportın alu öçen mäcbüri räweştä möselman dinen qabul itärgä kiräk. İslam wäkillärenä kiügä çığıp, başqa ilgä küçenep kitkän xatın-qızlarnıñ balaları da ğädättä islam moxitendä tärbiälänä, dide yepiskop Mark.

Dini tolerantlıq yäğni ber-bereñneñ dinenä sabırlıqta yäşägän ğailälärneñ dä buluın tanıp, ul ğädättä ir keşe xatın-qıznı üz dinenä buysındırırğa tırışa dip belderde. Ğailädä keşelär tän belän genä tügel, ä ruxları belän dä quşıla. Şuña kürä ğailädä ber keşe mäçetkä yörsä, ä ikençese çirkäwgä kitsä, ruxi berdämlek turında süz dä yuq, dide Mäskäw patriarxatında tışqı elemtälär bülegeneñ citäkçese Yeğor'yewski Mark. Şuşı xaqta islam dine ähelläre ni uylıy ikän? Törle din wäkilläreneñ bergä ğailä qoruğa alarnıñ qaraşı nindi? Şuşı xaqta bez Qazannıñ häm respublikanıñ üzäk töbäkläre qazıyı, ğalim Röstäm Zinnurovtan soraştıq. Menä anıñ fikere:

Bezneñ islam dinendä Allağa şöker bernindi köçläw yuq. Här keşe ixtiarlı. Şuña kürä pravoslau dinendä bulğan xatın-qız möselman ir-atına kiäwgä bara ikän, bu anıñ qararı. Ul üz ixtiarı belän islam dinen qabul itärgä mömkin. Bu oçraqta ul islamnıñ nigezlären öyränä. Nikax ütkärelgändä isä nikaxnı ütkärüçelär bu xatın-qızğa böten mäğnäsen añlatıp birälär. Şulay itep, bez mondıy nikaxlarğa qarşı tormıybız. Alar uqıla häm kiläçäktä dä uqılaçaq dip uylıym.

Al'bina Zäynulla

XS
SM
MD
LG