Accessibility links

Кайнар хәбәр

Peterburgta Säydäş kiçäse


Ütkän yäkşämbedä yaña oyışmabız "Peterburg tatarları cämğiäte" yaña sezonın açıp cibärde.Belosel'skiy-Belozerskiylar sarayında Salix Säydäşevqa bağışlanğan kiçä uzdırdı.

Tamaşaçı, işektän kerügä ük, Säydäş moxitenä elägä: basqıçtan konsert zalına "Bez qabızğan utlar"-ike yaqtan yandırılğan şämnär- aşa kütärelä. Menügä anı İrek Säfärğalievnıñ Säydäş muzıkasınnan alınğan ilham belän töşerelgän räsemnäre qarşı ala. Rässamnıñ icadi psevdonimı Säfär Ğali. İrek Säfärğalievnıñ Salix Säydäşev muzıkasın tıñlıy-tıñlıy yazğan eşläreneñ isemnäre dä "Ädrän diñgez", "Al çäçäklär". Rässam yaña "syurfuturizm" dip atalğan stil'dä eşli Futurizm- kiläçäk sänğäte, syurrealizm- cismi bulmağan dönyanı taswirlau- çäçäk islären, muzıkanı.".Anıñ öçen muzıkanı, isne buyaw tuzanına äyländerep käğäzgä salırğa kiräk. Syurfuturizmnıñ üzeneñ dä kiläçäge çiksez", - di rässam.

Konsert zalında inde xalıqnı ilhamnıñ iñ zurısı- mäşhür cırçıbız İlham Şakirovnıñ üze belän oçraşu kötä ide.Soñğı yıllarda konsertlarda şırdıy- bırdıy cırlar işetep arığan piterlılar bu yulı klassik kompozitorıbız äsärlären, xalqıbız icatı cäwhärlären tıñlap läzzätländelär. Rezeda Galimova belän Georgiy İbuşevnıñ cırların da, muzıkantlar Marat Zaripov, Al'bert Äsädullin, Tälğat Äxmätov, Röstäm Välievnıñ çığışların da alqışlarğa kümdelär.

Salix Säydäşev kiçäse- "Peterburg tatar cämğiäte" başlağan zur proyektnıñ ber bite genä. Alda- başqa kompozitorlar, kürenekle cırçılar, muzıkantlar icatına bağışlanğan çaralar. İdeyäneñ avtorı Älfiä Räxmätullina äytüençä, bu proyektnıñ maqsatı- xalıqnıñ yuğala başlağan muzıkal' zäwığın üsterü

.Bu eştä İlham Şakirovqa zur ışanıç totıla . Proyektnıñ berençe kiçäsen Salix Säydäşev icatına bağışlanuı da İlham Şakirov täqdime buyınça ikän. Çönki anıñ uyınça tatar professional' muzıka sänğätenä nigez salğan keşe turında härber tatar belergä tieş. Kompozitornıñ äsärlärenä xalıqçanlıq, moñ xas. "Ämma moñ, moñlılıq ul , qayber keşelär uylawınça tatarnıñ meskenlegennän kilmi. Moñ ul millätneñ ruxı, millätne millät itkän närsä. Moñlılıq meskenlektän digän fiker - yalğış fiker"., - dip sanıy İlham Şakirov.

Gölzadä Kamalova, Sankt-Peterburg

XS
SM
MD
LG