Accessibility links

пәнҗешәмбе, 23 март 2017, Казан вакыты 17:23

Rusiä belän Gruziä arasında küzläw cäncalı kiskenläşä bara


Rusiä belän Gruziä arasındağı küzläw cäncalı köçäyä bara. Pänceşämbe könne Rusiä üzeneñ Gruziädäge ilçesen çaqırtıp aldı häm BMO İminlek Şurasın Gruziäne qurqınıç häm qabul itelmäslek adımğa baruda ğäyepläwne soradı. Comğa könne Gruziä isä küzläw eşlärendä ğäyeplänep qulğa alınğan 4 Rusiä ofitserınıñ mäxkamä qarşına basuın iğlan itte.

Gruziä eçke eşlär ministrı Vano Merabişvili comğa könne mäxkamä qarşına basqan 4 Rusiä ofitserınıñ yäşeren mäğlümätlär tuplawğa Gruziä watandaşların cälep itüçe küzläw çeltäre äğzaları buluın raslawçı dälillär bar dip belderde. Çärşämbe könne älege Rusiä ofitserlarınıñ qulğa alınu ike il arasındağı bolay da kierenke mönäsäbätlärne tağın da kiskenläşterep cibärde.

Uzğan töndä BMO İminlek Şurasınıñ Rusiä möräcäğäte belän ütkän aşığıç utırışınnan soñ Rusiäneñ BMOdağı ilçese Vitaliy Çurkin "Bügen bez BMO İminlek Şurasına xäzerge wäzğiät turında zarlanıp häm borçılu belderep kenä tügel, İminlek Şurasın, xalıqara cämäğätçelekne Gruziä xakimiätlären awızlıqlarğa çaqırıp ta möräcäğät ittek. Çönki bez bolay da kierenke bu töbäktä wäzğiätneñ tağın da naçarayuın telämibez" dide.

Bu cäncal Abxaziä belän Könyaq Osetiädäge tuñdırılğan nizağlar belän dä bäyläp qarala. Abxaziädä BMO küzätüçeläre eşli häm Çurkin BMO räsmilären Abxaziä turında söyläşergä çaqırdı.

2 yıl suğıştan soñ 1993-nçe yılda Gruziädän de facto ayırılğan Abxaziägä Mäskäw yardäm itep kilä. Gruziä Rusiäne separatist köçlärne yaqlawda ğäyepli. Mäskäw monı kire qağa.

Gruziä prezidentı Mixail Saakaşvili pänceşämbe könne "Gruziä kileşülär qısasında eş itä, bu kileşülär nigezendä üz östenä alğan yöklämälärne üti. Gruziä şulay uq üz qanunnarın saqlıy häm härkemneñ bu qanunnarnı xörmät itüen teli. Härkemgä bezdä näticäle däwlät aparatı buluın häm cämğiätneñ räxmätenä, xörmätenä layıqlı köçle keşelär buluın iskä töşerergä waqıt citte" dide.

Rusiä saqlanu ministrı Sergey İvanov Mäskäwneñ Gruziägä tieşençä häm sizelerlek itep cawap biräçägen belderde. Comğa könne ul Sloveniädä NATO saqlanu ministrları belän oçraşuda bu mäsäläne kütärde häm NATOnıñ Gruziä belän tığızraq mönäsäbätlär urnaştıru niätenä borçılu belderde.

Oçraşudan soñ NATO general sekretare Jaap de Hoop Scheffer "Üz isememnän tınıçlanırğa häm qatlawlandırmasqa çaqıru bulde. Bu barlıq taraflarğa da qarıy. Bu Gruziägä dä, bezneñ Rusiäle duslarıbızğa da qarıy, bu ğömümi möräcäğät" dide.

Comğa könne Rusiä Tiflis ilçelegendäge xezmätkärlären evakuatsiäli başladı. Älegä Rusiä bu küzläw cäncalın söyläşülär häm diplomatik çaralar belän genä çişärgä cıyına kebek.

Ämma Russia in Global Affair jurnalı baş möxärrire Fyodor Lukyanov azatlıq radiosına söyläşülär fayda kitermäsä Mäskäw qatıraq çaralarğa da barırğa mömkin dide.

"Rusiäneñ reaksiäsen älegä urtaça dip äytep bula. Älegä kire qaytıp bulmaslıq adımnar yasalmadı. Şulay da xällär bik yaxşı yaqqa barmıy. Ägär dä çittän mäsälän Gruziägä kierenkelekne beterü öçen basım yasalmasa Rusiäneñ reaksiäse urtaçıl ğına bulıp qalmasqa mömkin" dide Lukyanov.

Tiflistäge Rusiä ilçegelege atnakiçtä ük Gruziä watandaşlarına viza birüne tuqtattı. Rusiä üz watandaşların mäxkamälärdä yaqlaw öçen Tifliskä advokatlar cibäräçägen belderde.

Naif Aqmal, Praga.
XS
SM
MD
LG