Accessibility links

пәнҗешәмбе, 8 декабрь 2016, Казан вакыты 07:06

Hindstan Paqstannı Mumbay şartlawların oyıştıruda ğäyepli


Hidsdntan politsiäse yül ayında Mumbay elekkeçä Bombey şähärendä bulğan şartlawlar öçen Paqstan maxsus xezmätlären häm suğışçılarnı ğäyepli. Paqstan bu ğäyepläwlärne şunduq kire qağıp Hindstannı dällilämi genä mondıy belderülär yasawdan tıyılırğa çaqırdı.

Ämma bügen Hindstan tışqı eşlär ministrı Şiv Şankar Menon tizdän paqstanğa dälillär tapşırılaçaq, 11 yüldä Mumbayda bulğan şartlawlar öçen Paqstannıñ İSİ maxsus xezmätläre häm Paqstandağı Laşkar-i-Taiba suğışçan törkeme ğäyeple buluı raslana dide.

Berençe bulıp bu ğäyepläwlärne şimbä könne Mumbay politsiä citäkçese Roy belderde.

"Böten bu höcümne Paqstannıñ İSİ xezmätläre planlaştırğan häm anı tormışqa aşırırğa Laşkar-i-Taibanıñ cirle äğzaları häm Hindstan İslam studentlar oyışması xezmätkärläre yardäm itkän. Äzerlek eşläre mart ayında başlanğan. Bez bu eşkä bäyke 15 keşene qulğa aldıq" dide.

Roy höcümne äzerläwneñ qayber öleşlärendä Mumbaydağı häm Hindstannıñ başqa öleşlärendäge äğzalar qatnaşqan dide. Anıñ äytüençä, ul cirle äğzalar Paqstandağı suğışçan törkem belän bäyläneştä bulğan häm şartlatuğa äzerlekne dä Paqstanda ütkän.

Ul şulay uq poyezdda şartlağan şartlatqıçnıñ Paqstannan kiterelgän buluın häm alarnı kem şartlatqanlığın da äytte.

"15-20 kilogramlap RDX şarlawçı matdäse Paqstannan kiterelgän häm ul İşanulla şartlatqan bombanı yasaw öçen qullanılğan. Başqa matdälär, mäsälän ammonum nitratı Hindstanda tabılğan. Bombanı 8-nçe, 9-nçı häm 10-nçı yüllärdä Mumbaynıñ Şivali Nagar öleşendä Möxämmät Ali yortında yasağannar" dide Roy.

Paqstan tışqı eşlär ministrı Tasnim Aslam Roynıñ bu ğäyeplärlären şunda uq nigezsez häm cawaplılıq belän äytelmägän süzlär dip kire qaqtı.

"Bu belderülärdä, Mumbay şartlawlarınnan soñ uq bulğan belderülärdäge kebek raslanmağan ğäyepläwlär bar. Häm bu iğtibarnı terroğa säbäp bulırğa mömkin Hindstandağı eçke problemalardan citkä borırğa mataşu kebek toyıla" dide Aslam.

Bu ğäyepläwlär Hindstan belän Paqstan arasındağı tınıçlıq söyläşülärenä nıq qomaçawlıy ala. Mumbay şartlawlarınnan soñ Hindstan söyläşülärne tuqtattı. Ämma sintäber ayında Hindstan premyer ministrı Manmohan sing Paqstan prezidentı Pärwäz Möşärräf belän quşılmawçı däwlätlär sammitında oçraşıp söyläşülärne yañartırğa kileşkän ide.

Naif Aqmal, Praga.
XS
SM
MD
LG